Праздничные Акафисты

[-] Свернуть

Акафист Рождеству Пресвятой Богородицы

Добавить в Любимые закладки

Кондак 1
Избранней от человеческого рода и рождшейся от неплодове, Пречистей Деве Марии составим похвалу, яко рождеством Ея начало спасения нашего бысть и пришествие в мир Избавителя возвестися. Темже радостно Ей возопиим: Радуйся, Пречистая Дево, Материю Спасителя мира от века предъизбранная.

Икос 1
Ангел небесный предстояй пред Богом, послан бысть к праведным Иоакиму и Анне возвестити им радость велию, яко по неплодствии своем имут родити Дщерь Преблагословенную, от Неяже всему миру радость произыдет. Темже и мы, радости сея причастницы, похвальная песни Деве воспоем: Радуйся, в Троичном Совете Материю Сына Божия от века предъизбранная; радуйся, древними пророками с патриархи многообразне в образех и сенех прообразованная. Радуйся, вящшие пяти тысящ лет от создания мира верными Божиими рабы, яко Матерь Избавителя ожиданная; радуйся, лествицею Иаковом виденною, Божие к человеком снизшествие прообразовавшаго предуказанная. Радуйся, неопалимою купиною в пустыни Синайстей Моисеом виденною, предвозвещенная; радуйся, Чермным морем Израилю сух путь давшему, фараона же потопившему, образне преднаписанная. Радуйся, написатися нам в книзе Живота Вечнаго пособствующая; радуйся, Царствия Небеснаго невозбранный вход нам ходатайствующая. Радуйся, Пречистая Дево, Материю Спасителя мира от века предъизбранная.

Кондак 2
Видяще праведнии Иоаким и Анна явльшагося им Ангела, возвещающа рождество Твое, Пресвятая Дево, возблагодариша Бога, призревшаго отъяти поношение безчадия их, и всем сердцем тепле возопиша: Аллилуиа.

Икос 2
Разум Божественнаго строительства и на землю снизшествия Своего Всеблагий Господь исполнити начиная, посланием Ангела Своего возвестити Иоакиму и Анне о рождестве Твоем, Пресвятая Дево. Темже вопием Ти хвалебно: Радуйся, разума Божественнаго проявление; радуйся, дивнаго смотрения Его исполнение. Радуйся, древле предуставленная послужити воплощению Сына Божия; радуйся, от всех родов в жилище всех Царя предъизбранная. Радуйся, еще в рай изречением искусителю змию о положении вражды между тем и Женою и Семенем Ея предуказанная; радуйся, по исполнении времен от неплодове изволением Божиим славне произшедшая. Радуйся, род человеческий рождеством Своим возвеселившая; радуйся, сетование чаявших утехи Израилевы преложившая. Радуйся, Пречистая Дево, Материю Спасителя мира от века предъизбранная.

Кондак 3
Сила Вышняго разреши неплодство заматоревшия во днех своих праведныя Анны: зачат бо Тя, Пречистая, и, чая Твоего рождения, радостно пояше Богу Израилеву хвалебную песнь: Аллилуиа.

Икос 3
Имущая безмужно родити Спасителя душ и телес наших, Ты и Сама, яко чудо пред велиим и непостижимым чудесем, от неплодных родителей славно родися, Пресвятая Дево. Темже воспеваем Ти сице: Радуйся, от корене Иессеова и Давидова произшедшая; радуйся, от неплодных ложесн праведныя Анны дивно прозябшая. Радуйся, пророчеством Исаии прежде лет древних Дева-Матерь проявленная; радуйся, по обетованию Ангела рожденная. Радуйся, скиниею свидения и Ковчегом завета прообразованная; радуйся, процветшим жезлом Аароновым образне прознаменованная. Радуйся, прежде рождества Твоего в Матерь Богу-Слову освященная и предуготованная. Радуйся, Пречистая Дево, Материю Спасителя мира от века предъизбранная.

Кондак 4
Бури поношений человеческих о неплодствии своем избавльшеся в зачатии Твоем, Пресвятая Дево, праведнии родителие Твои радовахуся, и в честь рождества Твоего учреждение велие творяху сродником и знаемым, и тии срадовахуся им, вопиюща Богу, сотворшему милость Свою, хвалебную песнь: Аллилуиа.

Икос 4
Слышавше окрестные людие, яко дщи Иоакима и Анны наречена бысть Мария, сиесть Госпожа, проразумеваху, Пречистая, велику и славну Тя быти не токмо в людех, но и у Бога. Мы же сбытие сего добре ведуще, величаем Тя сице: Радуйся, Пресвятая Дево, не от человека, но от Ангела имя Себе еще прежде зачатия приявшая; радуйся, по имени сему Госпожею всея твари быти сподобльшаяся. Радуйся, яко праведнии родителие Твои воздающе Богу благодарение за рождение Твое, великия дары в жертву Тому принесоша; радуйся, яко сродником и знаемым, купно же и убогим вечерю любве сотвориша. Радуйся, яко от священников, в дом родителей Твоих на торжество позванных, благословена еси; радуйся, яко от всех на веселие оно собравшихся, похвалена и прославлена была еси. Радуйся, выше всякия чести и похвалы явльшаяся; радуйся, Материю Бога-Слова быти сподобльшаяся. Радуйся, Пречистая Дево, Материю Спасителя мира от века предъизбранная.

Кондак 5
Боготечная звезда, возвещающая пришествие Солнца Правды, Христа Бога нашего, в рождестве Твоем явися, о, Пресвятая Дево; темже людие Божии, пришествия Избавителя верою чаявшии, видяще Тя чудно от неплодове рождшуюся, таинственно возвеселишася и возопиша: Аллилуиа.

Икос 5
Видевши праведнии Иоаким и Анна рождшуюся от них Богоотроковицу Марию, о Нейже Ангел Божий некая чудная и дивная тем провозвести, яко кивоту Божию, Той послужиша, воспитавающе и храняще Ю, якоже зеницу ока. Темже и мы похваляюще Богоотцев, сподобившихся родительми быти таковыя Дщери, Деве Марии радостно воспеваем: Радуйся, Пречистая Дево, яко по рождестве Твоем родителие Твои вельми возликоваху; радуйся, яко в явлении Твоем в мир Ангели и человецы согласно возрадовахуся. Радуйся, яко о Тебе вси пророцы многообразне предглаголаху; радуйся, яко един от них Вратами затворенными, ин же Горою приосененною Тя именоваху. Радуйся, яко вся преславная древле таинственно о Тебе предглаголано быша; радуйся, яко Градом и Селением Божиим псаломническая уста Тя наименоваша. Радуйся, седмосвещным светильником, яко седмию дарами Святаго Духа исполнена быти имевшая, предуказанная; радуйся, позлащенною трапезою с хлебами предложения, яко Хлеб Жизни, Христа, родити имевшая, предуказанная. Радуйся, Пречистая Дево, Материю Спасителя мира от века предъизбранная.

Кондак 6
Проповедник богоносных вещания и глаголы исполняя, изволением Зиждителя твари на земли явилася еси, Пресвятая Дево, естества нашего цвете, Адама же и Евы воззвание и на первую доброту возведение. Темже вси вернии в рождестве Твоем радость обретши, духовно торжествующим, поюще дивному в Совете Своем Богу нашему: Аллилуиа.

Икос 6
Возсия в рождестве Твоем, Пречистая, заря спасения нашего, во исполнение Божественнаго смотрения, имже едина Ты от всех родов достойна явилася еси плоть заимодати Зиждителю Твоему, пришедшему спасти род наш от древния праотеческия клятвы. Сего ради взываем Ти сице: Радуйся, Адама и Евы воззвание; радуйся, древния клятвы разрешение. Радуйся, сеновнаго закона конец и новыя благодати начало; радуйся, промышления Божественнаго Таинница и на делания благая нас присно наставляющая. Радуйся, едина во всех родех достойно обретшаяся быти Материю Бога-Слова; радуйся, и нам новым во Христе людем духовная Мати явльшаяся. Радуйся, Матерним Твоим попечением николиже нас оставляющая; радуйся, в сыны и дщери Сыну Твоему достойны и благоугодны нас приуготовляющая. Радуйся, Пречистая Дево, Материю Спасителя мира от века предъизбранная.

Кондак 7
Хотяще обеты своя Господеви воздати, праведнии родителие Твои, Пресвятая Дево, трилетствующую Тя отроковицу приведоша в храм Господень со славою и радостию многою, первосвященник же (Захария), Духом Божиим объятый, введе Тя во Святая Святых, яже прообразом токмо быша Твоея Святыни. Ты бо вместила в Себе не кивот Завета, но святых Святейшаго Сына Божия, во утробе Твоей девственней плоть восприявшаго. Емуже Ты с лики девическими выну воспевала еси: Аллилуиа.

Икос 7
Новое и преславное промышление Божественное бысть о Тебе, Дево Марие. В храме бо Божием жительствующи пищу от рук Ангельских принимала еси, Пресвятая. Темже молим Тя: напитай нас пищею благодатною, да возрастем духовно в мужа совершенна и Тебе, Всецарице, похвальная возопием: Радуйся, преукрашенная добродетельми, Отроковице, в храме Божием жити и Ангелом Собеседнице быти сподобльшаяся; радуйся, посылавшуюся Тебе Богом пищу от Ангелов во Святая Святых принимавшая. Радуйся, небесным хлебом во храме чудесно воспитанная; радуйся, к великому таинству воплощения Сына Божия тамо предуготованная. Радуйся, яко повелением Божиим Ангели на земли Тебе усердно служаху; радуйся, яко тии ныне на Небесех, яко Царице, благоговейно Тебе служат. Радуйся, яко и мы недостойнии песньми хвалебными присно Тя величаем; радуйся, яко и рождших Тя Богоотцев всегда ублажаем и в молитвах их призываем. Радуйся, Пречистая Дево, Материю Спасителя мира от века предъизбранная.

Кондак 8
Странное рождество Пречистыя Девы видевше, устранимся суетнаго мира, ум на Небеса преложше, идеже Богоматерь во славе предстоит Сыну Своему и Богу, ходатайствующи пред Ним о всех верных, всеславное рождество Ея (и в храм введение) любовию празднующих и вопиющих Богу: Аллилуиа.

Икос 8
Вся тварь в рождестве Твоем, Пречистая, обрете радость, печаль праотеческую потребляющую: произшедшим бо от Тебе Христом Богом, падшее во грех преслушания естество наше от падения воста и паки любезно Зиждителю сотворися. Темже умильно Ты взываем: Радуйся, всемирныя радости предвозвещение; радуйся, таинство от века сокровеннаго явление. Радуйся, Еюже падения востахом; радуйся, Еюже прежде отриновенное естество наше истее Богу присвоися. Радуйся, Еюже Иоаким и Анна поношения безчадия свободившася; радуйся, Еюже безплодие сердец наших в благоплодие применися. Радуйся, Еюже обилие благ вечных верным от Господа подается. Радуйся, Пречистая Дево, Материю Спасителя мира от века предъизбранная.

Кондак 9
Вси Ангели Божии не ведевшии тайны Боговочеловечения в Совете Триипостаснаго Божества от века сокровенныя и напоследок Девою Мариею явленныя, вельми удивлены быша, зряще, како Дщи Иоакима и Анны необычно естеству женскому, во Святая Святых введеся. Темже недоумением объяти бывше, благоговейно вопияху: Аллилуиа.

Икос 9
Ветия древнейший, всемудрый в царех Израилевых Соломон, провидя рождество Твое, Пречистая, в Песнех Песней со удивлением возглашаша: "Кто Сия, проницающая, аки утро, добра, яко луна, избранна, яко солнце". Темже Церковь ликовствующи в празднице Твоем, весело Тебе вопиет: Радуйся, невечерняго дне Боговедения утро светлейшее, в законней сени, яко во мраце, возсиявшее; радуйся, солнцеобразная Дево, истинное Солнце — Христа, девственным воплощением в мир введшая и тем вся просветившая. Радуйся, световидная стихия, существенно приявшая Бога, живущаго во свете неприступнем; радуйся, Своим малым чревом объявшая Безпредельнаго, вся концы вселенныя объемлющаго. Радуйся, полная луно, свет божественный непосредственно восприемлющая и нас тем озаряющая; радуйся, чистейшее зерцало, в немже многая совершенства Божия чудно и верно изображаются. Радуйся, совершенством Твоих добродетелей и нас к тому же подвизающая; радуйся, немощныя наши силы к творению добрых дел подкрепляющая. Радуйся, Пречистая Дево, Материю Спасителя мира от века предъизбранная.

Кондак 10
Спасти хотя род человеческий от первородныя клятвы, дивное смотрения Своего таинство сотвори Господь: избра бо Тя, Пречистая, от рода Авраамля и Давидова, и от Тебе безсеменно воплотитися благоизволи, прешед уставы естества, но и тя произведе от заматоревша и неплодна корене Иоакима и Анны праведников. Темже рождество Твое (и в храм вхождение) днесь празднующи и рождших Тя песньми восхваляющи, вопием Богу: Аллилуиа.

Икос 10
Царю Небесный, спасения нашего ради хотя на земли явитися и с человеки пожити, чертог свят воплощения Своего, Тя, Пречистая, предуготова, подав плод безчадной Анне, слезно с супружником Своим, молившимся о разрешении своего неплодства. Темже молим Тя, Богомати: разреши неплодие душ наших, да возможем принести Богу плод благих дел добродетели, взывающе Ти сице: Радуйся, пресветлый Чертоже безсеменнаго Божия воплощения; радуйся, одушевленная Палато, в жилище всех Царя предуготованная. Радуйся, светлейший облаче, имже Седящий на престоле Божества к нам сниде; радуйся, Посреднице закона и благодати, запечатление Ветхаго и Новаго Заветов. Радуйся, неувядаемая Лозо, прекрасный цвет — Спасителя мира, произрастившая; радуйся, благовонное яблоко, от неплодове произрастшее и Христу благоугодно явльшееся. Радуйся, и нас, певцев Твоих, благоугодны Христу представити тщащаяся; радуйся, яко и нас, безплодны сущих делы благими, не лишаеши духовнаго утешения. Радуйся, Пречистая Дево, Материю Спасителя мира от века предъизбранная.

Кондак 11
Песнь хвалебную рождеству Твоему (и в храм введению) приносящих не отрини, Владычице Благая, но рождших Тя ради, благоцветлива нам буди, молящи о нас Сына Твоего и Бога нашего, да подаст грехов прощение и жития исправление, еже в покаянии слезном выну благодарно воспеваем Ему: Аллилуиа.

Икос 11
Светоприемная и премирная Божественнаго света Свеща, единородная Дщерь Иоакима и Анны, предъизбранная в Матерь Единородному Сыну Божию, днесь от неплодове преславно произыде, и просвещает всех рождество Ея (и в храм вхождение) верно празднующих и благоговейно взывающих: Радуйся, светозарная Свеще, Божественным пламенем возжженная; радуйся, и нас тем благодатно просвещающая и согревающая. Радуйся, таинственная Клеще, Угль Божественный Христа Господа во утробе и на руках Твоих носившая; радуйся, и нас в Таинстве Причащения приимати Того сподобляющая. Радуйся, живый и преукрашенный Храм Господень, о Немже поет Давид: "Свят Храм Твой, дивен в правде"; радуйся, Кадильнице Святая, не фимиам, в воздухе разливающийся, но Христа, вечное благовоние в Себе вместившая, и всю тварь тем облагоухавшая. Радуйся, Престоле, превознесенный со славою, одушевленное седалище Великаго Царя, нашего же Спасителя и Господа; радуйся, Царице Небесе и земли, с Сыном Твоим и Богом вечно царствующая и нас, убогих, не забывающая. Радуйся, Пречистая Дево, Материю Спасителя мира от века предъизбранная.

Кондак 12
Благодати паче, неже естества действо проявися в рождестве Твоем, Пречистая; молитву бо безчадных родителей Твоих, Господь услышав, подаде Тя им в утешение, якоже Аврааму и Сарре Исаака, восхотев вкупе и Своего смотрения таинство на Тебе совершити и уготовати Тя в Матерь Единородному Сыну Своему, обетованному нашему Искупителю. Емуже благодарно поем: Аллилуиа.

Икос 12
Поюще славное Твое от неплодове рождение (и в храм Господень введение), хвалим Тя Пречистая, яко Таинницу Божия о нас спасительнаго смотрения, воплощением от Тебе Бога-Слова явленнаго, и вопием Ти сице: Радуйся, чистая Ноева Голубице, рождеством Твоим престатие потока смертнаго возвестившая; радуйся, ветвь благовестия Христа Спасителя погибавшему грехом роду человеческому принесшая. Радуйся, едина блаженная в женах, послушанием Твоим Богу преслушание праматери Евы исправившая; радуйся, печаль Адама и прочих праотцев, (истомившихся ожиданием пришествия Избавителя) рождеством Твоим в радость преложившая. Радуйся, яко рождество Твое радость возвести всей вселенной; радуйся, яко в рождестве Твоем матери радуются и неплоды веселятся (ведуще, яко и Ты от неплодове произошла еси). Радуйся, яко и всех рождество Твое (и в храм вхождение) верно и благочестно празднующих сподобляеши благодатнаго веселия; радуйся, с Сыном Твоим, одесную Отца во славе Его, спосадити нас, Его много умоляющая. Радуйся, Пречистая Дево, Материю Спасителя мира от века предъизбранная.

Кондак 13
О, Всепетая и Пречистая Мати Дево, приими сие наше хвалебное пение в честь преславнаго рождества Твоего (и в храм введения) приносимое, и возроди в нас желание благ вечных, вкупе же и избави нас, Церковь Твою Святую, Отечество наше и обители иноческия от всяких бед и напастей, от врагов видимых и невидимых, и будущия изми муки и Небеснаго Царствия нас сподоби, да во веки веков о Тебе вопием: Аллилуиа.

(Этот кондак читается трижды, затем икос 1 и кондак 1)

Молитвы Рождеству Пресвятой Богородице

Молитва первая
О, Пресвятая Владычице, Христа Спасителя нашего Богоизбранная Мати, у Бога святыми молитвами испрошенная, Богу посвященная и Богом возлюбленная! Кто Тебе не ублажит или кто не воспоет, Твоего преславного рождества. Рождество бо Твое бысть началом спасения человеков, и мы, седящии во тме согрешений, зрим Тя, Неприступного Света жилище. Сего ради витийствующий язык не может песнословити Тя по достоянию. Паче бо серафим возвысилась еси, Пречистая. Обаче приими от недостойных раб Твоих нынешнее похваление и не отрини мольбы нашея. Твое величие исповедуем, Тебе во умилении припадаем и скорую в заступлении чадолюбивую и благоусердную Матерь дерзновенно просим: умоли Сына Твоего и Бога нашего даровати нам, много согрешающим, искреннее покаяние и благочестное житие, да возможем творити вся Богу угодная и душам нашим полезная. Возненавидим вся злая, укрепляемии Божественною благодатию во благом произволении нашем. Ты непостыдная надежда наша в час смерти, даруй нам христианскую кончину, безбедное шествие на страшных мытарствах воздушных и наследие вечных и неизреченных благ Царствия Небеснаго, да со всеми святыми немолчно исповедуем Твое о нас заступление и да славим единаго Истиннаго Бога, во Святей Троице покланяемаго, Отца и Сына и Святаго Духа. Аминь.

Молитва вторая
Преблагословенная Дево Марие, Царице небесе и земли, Твоему чудотворному образу припадающе, умиленно глаголем: призри милостиво на рабы Твоя и Твоим всесильным ходатайством ниспосли коемуждо потребная. Вся верныя чада Святыя Церкви спаси, неверныя обрати, заблуждших на путь правый настави, старость и слабость сил поддержи, юных в вере святой возрасти, мужество ко благу направи, грешников к покаянию приведи и всех христиан мольбы услыши, болящих уврачуй, скорби утоли, путешествующим спутешествуй. Ты веси, Всемилостивая, яко немощны, яко грешнии, яко озлобляеми и недостойни прощения Божия, обаче буди нам в помощь, да ни коим грехом самолюбия, соблазна и диавольского прельщения прогневляем Бога: Тя имамы Предстательницу, Иже не отринет Господь. Аще бо восхощеши, вся даровати нам можеши яко благодатный источник, верно поющим Ти и превозносящим преславное Твое рождество. Избави, Владычице, грехопадений и бед всех, благочестно призывающих святое имя Твое и покланяющихся честному образу Твоему. Ты бо молитвами беззакония наша туне очищаеши, темже Тебе припадаем и паки вопием: отжени от нас всякаго врага и супостата, всякия напасти и губительнаго неверия; молитвами Твоими, подающи дожди благовременны и земле обильное плодоносие, вложи в сердца наша страх Божественный ко исполнению заповедей Господних, да вси тихо и мирно поживем во спасение душ наших, во благо ближних и во славу Господа, Ему бо, яко Творцу, Промыслителю и Спасителю нашему всякая подобает слава, честь и поклонение, ныне и присно и во веки веков. Аминь.

Молитва третья
О, Пречистая и Преблагословенная Дево, Владычице Богородице, от неплодове по обетованию рождшаяся и чистоты ради души и тела Твоего сподобльшаяся быти Материю Сына Божия, Господа нашего Иисуса Христа, с Нимже ныне на небеси пребывавши и имаши велие дерзновение ко Пресвятой Троице, от Неяже, яко Царица, венцем вечнаго царствования увенчана еси. Темже смиренно к Тебе прибегаем и просим: исходатайствуй нам у Всемилостиваго Господа Бога прощение всех прегрешений наших вольных и невольных; страждущему отечеству нашему спасения, мира, тишины и благочестия возстановление, времена мирны и безмятежны, крамол злых непричастны; ко изобилию же плодов земных, воздуха благорастворения, дожди мирны и благовременны. И вся, яже к житию и спасению нашему потребная, испроси нам у Сына Твоего, Христа Бога нашего. Наипаче же благопоспеши нам украситися благими нравы и добрыми делы, да, елико мощно, подражатели будем святому Твоему житию, имже от юности на земли украшалася еси, благоугождающи Господу; сего ради явилася еси честнейшая Херувим и славнейшая Серафим. Ей, Госпоже Пресвятая, буди нам во всем скорая Помощница и премудрая ко спасению Наставница, да Тебе последствующи и Тобою воспомоществуеми, сподобимся наследницы быти Небеснаго Царствия, страданиями Сына Твоего исходатайственнаго, исполнителям же святых заповедей Его обещаннаго. Ты бо еси, Госпоже, едина наша по Бозе надежда и упование, и Тебе весь живот наш предаем, чающе Твоего ради ходатайства и заступления не посрамлены быти в час исхода нашего от жития сего, и на Страшном Суде Сына Твоего, Христа Бога нашего деснаго Его стояния сподобитися, и тамо вечно радоватися со всеми от века Ему благоугодившими и немолчно славити, хвалити, благодарити и благословляти Его со Отцем и Духом во веки веков. Аминь.

Тропарь Рождеству Пресвятой Богородицы

Тропарь, глас 4
Рождество Твое, Богородице Дево, радость возвести всей вселенной: из Тебе бо возсия Солнце Правды Христос Бог наш и, разрушив клятву, даде Благословение, н, упразднив смерть, дарова нам живот вечный.

Кондак, глас тойже
Иоаким и Анна поношения безчадства, и Адам и Ева от тли смертныя свободистася, Пречистая, во святем Рождестве Твоем. То празднуют и людне Твои, вины прегрешений избавльшеся, внегда звати Ти: неплоды раждает Богородицу и Питательницу жизни нашея.

Величание
Величаем Тя, Пресвятая Дево, и чтим святых Твоих родителей, и всеславное славим Рождество Твое.

Акафист Богоявлению Господню (Крещение Господне)

Добавить в Любимые закладки

Кондак 1
Возбранный Воеводо, Царю неба и земли, Тебе Просветителя нашего зряще во Иордане от раба крещаема, небеса ужасошася, и вся земля вострепета, Ангели же удивишася и вся тварь возрадовася. Мы же недостойнии благодарственно Тебе вопием: ко грешником и мытарем явился еси, да водами омыеши человеков грехи. Слава Тебе, Сыне Божий, во Иордане Крестивыйся и весь мир просвещей, слава Тебе.

Икос 1
Ангельския днесь предгрядите силы, Владыку Христа зряще, ко Иорданским струям грядуща Адамов грех очистити, и смотряще толикое Божие таинство, со страхом прославите велие снисхождение Его, яко Бог человеком уподобися и отнюдь не ведый греха приходит, яко Агнец Божий взяти всего мира грехи. Сего ради прославляюще Божественное явление Христово, воспойте Ему якоже и в Вифлееме славословия сицевая: Слава Тебе, Сыне Божий, от Отца с небесе в мир сей пришедый. Слава Тебе, Превышний Боже, даже до рабия зрака снисшедый. Слава Тебе, Спасителю мира, яко человек ко Иоанну креститися грядый. Слава Тебе, Просветителю твари, яко нов Адам падшаго Адама грехи на Себе понесый. Слава Тебе, Безначальный Свете, велию зарю просвещения всему миру на Иордане возсияти восхотевый. Слава Тебе, Солнце Правды, светоносное утро благодати человеком в Богоявлении Твоем даровати возжелавый. Слава Тебе, мир от древния прелести омыти пришедшему. Слава Тебе, велие благочестия таинство нам показавшему. Слава Тебе, чудеса велия нам водами многими сотворившему. Слава Тебе, небеса и всю землю светом разума просветившему. Слава Тебе, фараона мысленнаго в струях Иорданских потопившему. Слава Тебе, новыя люди в водах крещения к вечной жизни приведшему. Слава Тебе, Сыне Божий, во Иордане Крестивыйся и весь мир просвещей, слава Тебе.

Кондак 2
Видев духом Божественный Предтеча Твое, Христе, в мир пришествие, прииде из пустыни на Иордан, светло людем вопия: Приближися и явися Избавление наше, покайтеся и водою очиститеся, и срести Его потщитеся, да чистыми помышлении просвещаеми, душами чистыми и нескверными усты с веселием воспойте Ему: Аллилуиа.

Икос 2
Разум небесный в себе являя, светильник Света, великий Предтеча, возопи к людем: Очиститеся, се бо предгрядет Христос от тли мир избавляяй, разрешити осуждение Адама Первозданнаго. Да возрадуется пустыня Иорданова и да процветет, яко крин, земля же вся ныне пророчески да возрадуется. Уготовайте путь Господень и правы сотворите стези Бога нашего, вси с веселием возопийте Ему тако: Слава Тебе, неизреченный Свете, от светильника миру предъявленный. Слава Тебе, Непостижимый Слове, от гласа Твоего Предтечею предреченный. Слава Тебе, Огню чистительный, Егоже действом всякая нечистота потребляется. Слава Тебе, Источниче Благодатный, Имже всякое естество человеческое освящается. Слава Тебе, Творче неба и земли, от раба креститися восхотевый. Слава Тебе, Сыне Единородный, на Иордан явитися изволивый. Слава Тебе, Царю Правды, у Негоже Предтеча ремень сапогу разрешити убояся. Слава Тебе, Владыко твари, Имже весь род человечь в Крещении Твоем возвеселися. Слава Тебе, Превечный Боже, яко Явление Твое просвещает и вразумляет младенцы. Слава Тебе, Свете мира, яко пришествие Твое просветляет и умудряет слепцы. Слава Тебе, яко у Тебе Источник живота. Слава Тебе, яко во свете Твоем узрим свет. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 3
Силу Божества Твоего, Христе, уразумев Предтеча, егда со страхом увиде Тя на Иордан пришедша, радуется душею и трепещет, рукою показуя Тя, и глаголет людем: Сей — избавляяй мир от истления. Сей — свобождай нас от скорби. Сей — вместо рабов, сыны Божии нас соделовает. Сей — вместо тьмы просвещает человеки водою Божественнаго Крещения. Се — Агнец Божий Вземляй грехи мира, Егоже сретающе, вопием: Аллилуиа.

Икос 3
Имея богатство милосердия, ко грешником и мытарем на Иорданскую реку пришел еси, Иисусе, не терпел бо еси зрети от диавола мучимый род человечь, но пришел еси, да паки речеши падшему Адаму: "Где еси? Не скрывайся от Мене. Хошу бо видети тя, аще наг еси и нищ, и тако уподобихся тебе, да не стыдишися". Сего ради проповедуем велие снисхождение Твое, вопиюще Тебе таковая: Слава Тебе, Пастырю Добрый, заблуждшее овча взыскати восхотевый. Слава Тебе, Сыне Единородный, понести тое на рамех пришедый. Слава Тебе, Милосте Безмерная, к человеком падшим долу низшедый. Слава Тебе, Любы Неизреченная, люди отчаянныя паки горе возведый. Слава Тебе, руки ослабленныя нищим укрепляяй. Слава Тебе, колена расслабленныя убогим исцеляяй. Слава Тебе, пустыню жаждущую яко Ливан возвеселивый. Слава Тебе, пустыню Иорданову, яко Кармил произростивый. Слава Тебе, Милостиве, яко льна курящагося не угасаеши. Слава Тебе, Долготерпеливе, яко трости сокрушенныя не погубляеши. Слава Тебе, взыскати и спасти погибшия пришедый. Слава Тебе, Адама отриновеннаго призвати восхотевый. Слава тебе, Сыне Божий, во Иордане крестивыйся и весь мир просвещей, слава Тебе.

Кондак 4
Бурею помышлений сумнительных исполнен бысть Предтеча, Христе Царю, егда Ты, яко человек на реку пришел еси и рабское крещение от него прияти восхотел еси, глаголя: простри руку твою и прикоснися верху Моему и ужас весь отряси, совершая повеленное. Трепетен бысть тогда Предтеча и возопи, глаголя: Что к рабу пришел еси, скверны не имый, Господи? Что ми повелеваеши, якоже выше мене? Высоты небесныя никакоже изследих звезд число, ниже землю николиже измерих. Како крещу Носящего горстию тварь? Како просветит светильник Света? Како руку положит раб на Владыку? Аз требую Тобою креститися, да воспою Тебе: Аллилуиа.

Икос 4
Слыша Человеколюбец Господь смиренных Предтечевых глагол высоту и видев страх его, рече к нему: добре, о Иоанне, яко благоговееши предо Мною, обаче остави ныне и отложи боязнь твою, должен еси послужити Ми, тако бо подобает нам исполнити всяку правду, да во Мне человеков очистятся греси. Сему человеколюбному слову Твоему внемлюще, с любовию вопием Тебе сице: Слава Тебе, Христе, Свете истинный, яко милость и истина о тебе сретостеся. Слава Тебе, Царю правды, яко правда и мир о тебе облобызастася. Слава Тебе, Сладчайший Иисусе, яко истина Твоя в Вифлееме от земли возсия. Слава Тебе, Всемилостивейший Спасе, яко правда Твоя во Иордане с небесе приниче. Слава Тебе, Очищение наше, яко водами крещения нас паче снега убеляеши. Слава Тебе, Просвещение наше, яко струями благодати сердце чисто в нас созидаеши. Слава Тебе, преклонивый снисхождением Небеса, главу Свою под руку Предтечеву приклонити восхотевый. Слава Тебе, Покрываяй водами превыспренняя Своя, в водах Иорданских погрузитися благоволивши. Слава Тебе, Господи сил, Егоже вся боятся и трепещут, велию боязнь Предтече отложити повелевый. Слава Тебе, щедрот Отче, у негоже милость безмерна и неизследованна, милостию Своею грехи мира покрыти изволивый. Слава Тебе, рождейся от Девы, Спасителю наш, посети нас неизреченным снисхождением Твоим. Слава Тебе, явлейся всему миру, Христе Боже наш, освяти нас Божественным явлением Твоим. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 5
Боготечная Струя сый благости, Господи, в струи Иорданския возшел еси, да водами омыеши человеческий грех: Ужас бе видети Творца небеси и земли в реце обнажшагося и от раба крещение приемлющаго. Ангельския силы дивляхуся, Иордан же река возвращаше струи свои, не могуще терпети огня поядающаго воды его, яко не обычно ему есть Чистаго измывати и Безгрешного отирати. Сего ради веселися Иордане реко, и да радуются источницы и езера, и вся бездны и моря, яко освятися днесь водное естество, свободившеся от таящагося тамо князя тьмы, и вся тварь веселящеся да поет с нами: Аллилуиа.

Икос 5
Видев Тя Божественный Иоанн Владыку твари в водах погружаема, да грехи всего мира погрузиши, и, обнажившагося, да Адамову наготу паки облечеши во одежду славы, вострепета душею и возопи Тебе, Агнцу Божию, очищающему согрешения мира: "Не смею прикоснутися верху Твоему, Владыко, Сам мя освяти и просвети, яко Ты еси Живот и Свет и Мир мирови". Обаче по глаголу Твоему со страхом возложи десницу свою на Божественную главу Твою, и крестив Тя, Безгрешна суща, с радостию возопи Тебе сице: Слава Тебе, Агнче Божий, грехи всего мира взяти на Себе пришедый. Слава Тебе, Спасе Милосердый, грехи всех человек потопити в водах Иорданских восхотевый. Слава Тебе, нас от скверны греховныя омывый. Слава Тебе, преступление Адамово разрешивый. Слава Тебе, Твоим на земли Богоявлением всех человек возвеселивый. Слава Тебе, Твоим во Иордане Крещением весь мир просветивый. Слава Тебе, нас ради до образа рабскаго обнищавшему. Слава Тебе, Твоею нищетою нас Обогатившему. Слава Тебе, вражие владычество Твоим смирением до конца низложившему. Слава Тебе, Царство Божие во Твоем крещении яве на земли созидати начавшему. Слава Тебе, путь Спасения на Иордане падшим людем показавшему. Слава Тебе, Свет Боговедения тамо верным Твоим возсиявшему. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 6
Проповедник дивный и Предтеча Иоанн многая изрече приходящим людем, во еже уготовати Тебе путь, Господи, обаче умолче, Тебе на Иордан пришедшу, зане Ты Сам рекл еси ему: "Не глаголю тебе: рцы Ми, яже глаголеши беззаконным и учиши грешники, точию крести Мя молча". Не подобаше бо гласу человеческому возглашатися, пришедшу Слову Божию и толикому таинству совершающуся, егда Ангели Божии со страхом предстояху и вся тварь вострепета. Сего ради и мы в молчании глубоцем и со многим благоговением вопием в сердце своем: Аллилуиа.

Икос 6
Возсия на Иордане всему миру просвещение велие и таинство страшное егда, Владыко Христе, крестився от Иоанна, Ты абие восшел еси от воды, "совозводя с Собою мир", и се отверзошася Тебе небеса, яже древле Адам затвори себе и сущим от него, да паки возрожденнии Тобою человецы восхождение улучат в райские обители, идеже с радостию да воспоют Тебе сице: Слава Тебе, Царю мира, средостение вражие разрушившему. Слава Тебе, милости Подателю, рай преслушанием затворенный, паки отверзшему. Слава Тебе, небо грехом заключенное, на Иордане паки отверзсто показавшему. Слава Тебе, Ангелы восходящия и нисходяшия отселе явити обетовавшему. Слава Тебе, схождением Твоим небеса до земли приклонившему. Слава Тебе, крещением Твоим землю до небес возведшему. Слава Тебе, откровением небес неизреченный тайны Божия всему миру открывшему. Слава Тебе, явлением горняго мира Святейшее благословение Божие всем верным преподавшему. Слава Тебе, небеса при Илие заключившему, не заключай нам двери милосердия Своего. Слава Тебе, небеса на Иордане отверзшему, отверзи нам входы Божественнаго Чертога Твоего. Слава Тебе, бездну человеколюбия при Крещении Твоем нам явившему, возведи от бездн земли всех до вражия отчаяния дошедших. Слава Тебе, восход до третьяго небесе избранным Твоим сотворившему, вознеси в небесныя обители и нас, до глубины греха ниспадших. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 7
Хотяй Человеколюбец Господь спасти мир во гресех погибающий, яви Троическаго Богоявления Своего великое таинство, и якоже в начале мирскаго бытия Дух Божий ношашеся верху воды, яко жизни Податель, тако и при крещении Твоем, Господи, егда на реце Иорданстей восхотел еси обновити и просветити погибающий род человечь и всю тварь с нами совоздыхающую, Той же Дух Святый паки сниде с небеси отверста в виде голубине и почи над Тобою, Господи, яко над новым Адамом, во еже пребывати отныне в новых людех банею водною возрожденных, да тако силою свыше облеченнии во обновление духа ходити начнут, поюще Богу: Аллилуиа.

Икос 7
Новую показал еси тварь, Владыко твари, в Твоем от Иоанна спасительном крещении, зане яко при Нои потопил еси грехи перваго мира, тако и в водах Иорданских паки потопил еси всего мира грехи, новотвориши бо земнородныя огнем и Духом и водою, странное совершая возрождение и обновление чудное. Духом бо новотвориши души, водою же освящаеши тело, назидая человека, и тако таинственно от воды соделоваеши Духом многочадну Церковь, да присно вопием Тебе таковая: Слава Тебе, Создателю твари, небеса приклонившему и на Иордан снисшедшему. Слава Тебе, Спасителю мира, небеса отверзшему и Духа Божественнаго нам явившему. Слава Тебе, Всеблаже, яко Дух Твой Благий наставит нас на землю праву. Слава Тебе, Всещедре, яко Тойже Дух Твой очистит нас от всякия скверны. Слава Тебе, водою и Духом, обветшавшее грехом естество наше обновившему. Слава Тебе, огнем Божества в струях Иорданских многосветлое просвещение даровавшему. Слава Тебе, Христе, вся Божественныя силы, яже к животу и благочестию, Духом Твоим Святым при крещении верным преподавшему. Слава Тебе, Иисусе, Нисшествием Духа Твоего Святаго причастники нас Божественнаго естества Сотворившему. Слава Тебе, почившим на Тебе Духом Премудрости и Разума чистое Боговедение людем открывшему. Слава Тебе, схождением на Тя Духа Божия дух совета и крепости, ведения и благочестия и дух страха Божия нам излившему. Слава Тебе, Иорданскою струею змиевы главы опалившему. Слава Тебе, явлением Духа Божия в виде голубине к голубиной кротости и чистоте девственной нас призвавшему. Слава Тебе, Сыне Божий, во Иордане крестивыйся, и весь мир просвещей, слава Тебе.

Кондак
Странно и дивно бысть явление святыя Троицы на Иордане: первее Сын Возлюбленный явися во плоти от раба крещаемый, абие Дух Святый сниде в виде голубине, последи же Пребожественный Отец возгласи с небесе, свидетельствуя: "Сей есть Сын Мой Возлюбленный, о нем же благоволих". О, велие и преславное таинство: "Возгреме с небесе Господь и Вышний даде глас Свой", да сбудется Давида праотца предречение: "Глас Господень на водах, Бог Славы возгреме, Господь на водах многих. Глас Господень в крепости, Глас Господень в великолепии". Сего ради и мы недостойными устами вопием Тебе из глубины души: Аллилуиа.

Икос 8
Весь еси в вышних, Иисусе, выну со Отцем на небесех соседяй, но и от нижних никакоже отступаеши, плотию от Чистыя Девы в Вифлееме рожденный, ныне же на Иордане всему миру явивыйся, да сущии во тьме и сени смертней сидящия просветиши светом Твоего Богоявления. Сего ради, просветившеся светом Тройческаго Откровения, вопием Тебе, явившемуся Богу, и на земли виденному и просветившему мир: Слава Тебе, Сыне Божий, в Вышних со Отцем и Духом покланяемый. Слава Тебе, Сыне Отечь, Предтечею от нижних славословимый. Слава Тебе, седый одесную Отца, Отеческим гласом с небеси проповеданный. Слава Тебе, воплотивыйся нас ради, возлюбленным Сыном Божиим от Того всему миру наименованный. Слава Тебе, во Иорданских струях явленный, Троицы Свет незаходимый в Крещении Твоем Показавый. Слава Тебе, дланию раба крещенный, нас рабов сущих банею пакибытия сыны Божия сотворивый. Слава Тебе, Источниче жизни и безсмертия, паки рождением водою и Духом к первому благородию райскому нас приведый. Слава Тебе, Творче неба и земли, огненным крещением новое небо и землю правды Твоея устроити грядый. Слава Тебе, Восточе востоков, во тьме и сени спящия Крещением Твоим просветивый. Слава Тебе, Свете от Света, Свет незримый Духа Твоего в душах наших возсиявый. Слава Тебе, Царю Безначальный, чистыми струями Крещения Твоего прародительский грех всеконечне омывый. Слава Тебе, Владыко твари, жаждущия люди водою жизни вечныя всебогатно напоивый. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 9
Все естество Ангельское удивися великому Твоего, Христе, Богоявления таинству: Адама бо грехом истлевшаго обновил еси Иорданскими струями и главы гнездящихся тамо невидимых змиев сокрушил еси во Твоем Крещении, и тако "глубины бездны сатанинския" открыл еси "дно", да избавиши ны от тоя "глубоких вод", и да начнеши созидати Царство Твое, не от мира сего сущее, о нем же пророк Давид предрече, глаголя: "Царство Твое — царство всех веков и Владычество Твое — во всяком роде и роде", егоже и мы прославляюще с вои небесными вопием Тебе: Аллилуиа.

Икос 9
Вития Божественный и Ангел Божий, Малахией предреченный, Великий Предтеча един точию от человек сподобися, Господи, во Твоем Крещении Духа пришествие видети и глас Отеческий с небесе слышати, свидетельствующий Твое Богосыновство, да будет первый всему миру проповедник Тройческаго Богоявления. Той во утрий день свидетельствова людем, глаголя: "Видех Духа Сходяща, яко голубя с небесе, и пребысть на Нем... И аз видех и свидетельствовах, яко Сей есть Сын Божий". Мы же сему богооткровенному свидетельству внемлюще, прославляем Богоявление Твое, Христе, поюще Тебе таковая: Слава Тебе, Боже Предвечный, явлением Святаго Духа свидетельствованный с небесе. Слава Тебе, Агнче Непорочный, гласом Предтечи проповеданный на земли. Слава Тебе, Крепосте Высочайшая, отверзстыми над Иорданом небесными враты затворенный рай нам открывшему. Слава Тебе, Милосте Предвечная, Крещением Твоим новый мир от вод Иорданских человеком явившему. Слава Тебе, Царю мира, мир и спасение на земли возвестившему. Слава Тебе, Солнце Правды, свет правды Твоея в душах наших возсиявшему. Слава Тебе, Святаго Духа в Твоем Богоявлении явившему, да чистым духом в небесный чертог Твой совнидем. Слава Тебе, Небеснаго Отца в Крещении Твоем нам показавшему, да вси право в Тя верующии сынове Его будем. Слава Тебе, в Дусе и огне, очерневшее грехом естество наше преславно просвещающему. Слава Тебе, водою и Духом истлевшее страстьми неможение наше пресветло очищающему. Слава Тебе, Богу явльшемуся плотию, весь мир в струях Иорданских обновившему. Слава Тебе, вземльшему на себе грехи мира, прародительский грех в водах Крещения потопившему. Слава Тебе, Сыне Божий, во Иордане крестивыйся, и весь мир просвещей, слава Тебе.

Кондак 10
Спасти хотяй падшее и обнищавшее естество наше, Христе Спасе, на Иорданскую реку пришел еси ко грешником и мытарем и восприял еси крещение от Иоанна, егда крестишася вси людие, да возмеши на Себе вся, погруженныя тамо в водах, человеков грехи, яко Агнец Божий и да готов будеши отселе волею на заклание тещи искупити всего мира грехи драгоценною кровию Твоею. Сего ради и погрузился еси в Иорданския струи, да спогребшися тамо, ко смертному крещению Себе уготовиши, о немже рекл еси ко страданию Грядый: "Крещением имам креститися и како томлюся, дондеже истяжут". Сего ради благодарственно поем Тебе: Аллилуиа.

Икос 10
Царю Превечный Христе Иисусе! Ты пришел еси на Иордан во явление всему миру, да разрешиши осуждение Адама первозданнаго, яко Судия Всемилостивый, Един сердца всех испытуяй, и да подаси новую жизнь человеком. Сего ради чистительную лопату рукою прием, всемирное гумно всемудре очистил еси, разлучая, яко Пастырь, овцы от козлищ. Сподоби и нам, во имя Пресвятыя Троицы крещенным, десныя части спасаемых в жизни сей всемерно искати, да угодно Тебе будет наше глашение Тебе сицевое: Слава Тебе, Архиерею, небеса прошедый, в Крещении Твоем всю землю онебесивый. Слава Тебе, Пастырю овцам Великий, ко стаду Твоему на Иордан пришедый. Слава Тебе, землю на водах основавый, всю землю нашу на водах Иорданских благодатию Духа обновивый. Слава Тебе, над водами небо утверждей второе, новое небо Церковь Твою водами Крещения сотворивый. Слава Тебе, Источниче жизни нашея, на источники спасения жаждущия люди Твоя призвавый. Слава Тебе, Проповедниче правды вечныя, духовную жажду нашу без цены и сребра утоливый. Слава Тебе, яко богат Сый в милости, за премногую любовь нас возлюбил еси. Слава Тебе, яко мертвых нас сущих грехми, водами крещения оживотворил еси. Слава Тебе, струям Иорданским спогребшемуся, да и мы в крещении в смерть и воскресение Тебе спогребемся. Слава Тебе, водами Иорданскими, яко ризою облекшемуся, да и мы в светлыя ризы правды и чистоты Тобою облечемся. Слава Тебе, средостение вражды Плотию Твоею разрушившему, да и нас, далече в море сущих, близь Себе устроиши. Слава Тебе, твоих человек во единем Теле Твоем примирившему, да и нас странных и пришельцев во единую Церковь Божию созиждеши. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 11
Пение новолепное да поет Тебе, Христе, вся тварь, от Девы рождшемуся и днесь во Иордане крестившемуся, людие же вси духовно да возвеселятся, прославляюще светлое просвещения нашего торжество и с божественным Григорием да воспоют, глаголюще: "Возрождения время — возродимся свыше, возсоздания день — облецемся в Новаго Адама, просвещения праздник — просветимся божественне", да во обновлении духа ходити начнем, выну со Ангелы поюще небесную песнь: Аллилуиа.

Икос 11
Светлый и Самосиянный Свете, Христе, Соприсносущный Свете Единосущнаго Отца! Возжег посреди Иордана, яко Твою, светильник, пречистую Плоть Твою, Ты возсиял еси, яко Солнце и даровал еси вселенней в Крещении Твоем велий и незримый свет Твоея благодати и истины, просвещаяй всякаго человека грядущаго в мир, да людие сидящие во тьме и сени смертной узрят свет велий и пойдут по нему. Просвети убо в великий день Светов и нас во тьме греха еще блуждающих, да просветляяся, обновляяся и возвышаяся горе, воспоем Тебе таковая: Слава Тебе, Просветителю мира, Духом Святым и огнем крестити пришедшему. Слава Тебе, Спасителю грешных, из глубины греха нас воздвигнути восхотевшему. Слава тебе, Безначальный и Присносущный Свете, скверну душ наших водами крещения очищаяй. Слава Тебе, Свете превысший всех светлостей, во светлостях святых Твоих верныя озаряяй. Слава Тебе, Славы Отчия Сияние, тьму неведения явлением Твоим разгнавшему. Слава Тебе, во Свете живый неприступнем, Свет боговедения Крещением Твоим возсиявшему. Слава Тебе, Свете от Света во тьме возсиявый, от тьмы грехов очисти нас. Слава Тебе, Солнце Правды, утро спасения возвещающее, во свете добрых дел настави нас. Слава Тебе, Невечерний Свете, во Иордане возсиявый, во Свете Твоем Свет незаходимый Пресвятыя Троицы облистай нам. Слава Тебе, образе Пресветлый Ипостаси Отчия, к чудному нестареемому животу банею пакибытия приведи нас. Слава Тебе, смерти Низложителю, от вечныя смерти избави нас. Слава Тебе, живота Начальниче, к вечней жизни настави нас. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 12
Благодать Божия спасительная всем человеком явися днесь во Твоем Крещении, Христе Спасе: пришел бо еси на Иордан, Едине Чистый, очистити человеческая согрешения и сокрушити главы гнездящихся тамо змиев, да даруеши благодать крепления решительную душ и телес наших. Сего ради с благочестием притецем прилежно к пречистым источником, да почерпнем с веселием воду жизни, благодать бо Духа невидимо подается всем верно почерпающим ю, и тайная дарования и Дух познания, Спасе, та вси благодарственно воспоем Тебе: Аллилуиа.

Икос 12
Поюще, Христе, Твое спасительное Богоявление, прославляем вси во Иорданских водах от Иоанна Божественное Крещение Твое, поклоняемся неизреченному к падшим человеком снисхождению Твоему и веруем со Предтечею, яко Ты воистину — Агнец Божий, Вземляй на Себе от вод Иорданских грехи всего мира, да омыеши и искупиши их Пречистою Кровию Твоею. Сего ради молим Тя: понеси и наши безчисленныя грехопадения и не лиши нас в великий день Светов благодатного возрождения Твоего, да чистым сердцем благодарственно вопием Тебе сице: Слава Тебе, Сыне Божий, велий свет к просвещению всего мира в водах Иорданских возсиявшему. Слава Тебе, Предвечный Боже, велию благодать и человеколюбие в Крещении Твоем всем человеком явившему. Слава Тебе, Спасителю заблуждших, заблуждшия безпутием человеки ко Иорданским струям искати пришедшему. Слава Тебе, Победителю жизни, новую чистую жизнь не по плоти, но во обновление духа даровати благоволившему. Слава Тебе, Владыко Живота и смерти, жало смерти притупившему и нетленную жизнь явлением своим возсиявшему. Слава Тебе, Творче неба и земли, горнее небо и землю на брегах Иордана в Крещении Твоем возвеселившему. Слава Тебе, Царю царствующих, яко царство мира сего отселе в Царство Твое начинает прелагатися. Слава Тебе, Господи господствующих, яко днесь всем хотящим спастися небеса отверзаются и все естество наше начинает убелятися. Слава Тебе, Спасе наш, на Иордан пришедый, спаси нас не от дел праведности, но по велицей Твоей милости. Слава Тебе, Христе Боже, водное естество освятивый, жаждущую душу мою благочестия напой водами по неизреченней Твоей благости. Слава Тебе, Единородный Сыне и Слове Божий, напитай сердце мое явлением словес Твоих. Слава Тебе, Всесильный Боже, творяй чудеса Един, согрей хладную душу мою разумением чудес Твоих. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 13
О, Иисусе Христе, Агнче Божий, пришедый на Иордан подъяти всего мира грехи! Приими малое сие от всея души приносимое Тебе моление наше, и просвети нас во тьме грехов седящих спасительным Твоим от Иоанна Крещением, да искупленнии Тобою от болезней душевных и телесных, во обновлении жизни право ходити начнем и со всеми святыми да воспоем Тебе: Аллилуиа.

(Этот кондак читается трижды, затем икос 1 и кондак 1)

Молитва Богоявлению Господню
Господи Иисусе Христе, Сыне Божий Единородный, от Отца прежде всех век рожденный, Свете от Света, просвещаяй всяческая, в последняя же лета от Пресвятыя Девы Марии нетленно воплощенный и в мир сей на спасение наше пришедый! Ты бо не потерпел еси видети от диавола мучима рода человеча и сего ради в пресветлый день Богоявления Твоего пришел еси на Иордан ко грешником и мытарем креститися от Иоанна, безгрешен сый, да исполниши всякую правду и да возьмеши в водах Иорданских грехи всего мира, яко Агнец Божий, во еже понести я на Себе и искупити Крещением крестным, пречистою Кровию Твоею. Сего ради погрузившуся Тебе в водах, отверзошася Тебе небеса Адамом заключенная и Дух Святый сниде на Тя в виде голубине, просвещение и обожение носяй естеству нашему, и Пребожественный Отец Твой возвести Тебе небесным гласом благоволение Свое, зане сотворил еси волю Его и человек грехи восприял еси и Себе на заклание уже предуготовал еси, якоже Сам рекл еси: "Сего ради любит Мя Отец, яко Аз душу Мою полагаю, да паки прииму ю", и тако во всесветлый день сей, Ты, Господи, положил еси начало искупления нашего от грехопадения прародительскаго. Сего ради вся силы небесныя радуются и вся тварь веселится, чающе свобождение свое от работы истления, глаголюще: Прииде просвещение, благодать явися, избавление наста, мир просветися и людие радостию исполняются. Да веселится ныне небо и земля и мир весь да играет; реки да плещут; источницы и озера, бездны и моря да срадуются, яко Божественным Крещением освятися днесь естество их. Да радуются днесь и человеков собори, яко естество их взыде ныне паки к первому благородию и вси с радостию да поют: Богоявления время. Приидите мысленно на Иордан, видение велие в нем узрим: Христос ко Крещению грядет. Христос ко Иордану приходит. Христос наши в воде погребает грехи. Христос овча похищеннаго и заблуждшаго приходит искати и обрет е вводит в рай. Сего Божественнаго таинства воспоминание празднующе, усердно молимся Тебе, Человеколюбче Господи: сподоби нам жаждущим по гласу Твоему приити к Тебе, Источнику присноживотныя воды, да почерпем воду благодати Твоея и оставления грехов наших и да отвергшеся нечестия и мирских похотей; целомудренно и девственно, и праведно и благочестно поживем в нынешнем веце, ждуще блаженнаго упования и явления славы Твоея, Великаго Бога и Спаса нашего, да не от дел наших спасеши нас, но по Твоей милости и по обновлению Святаго Духа Твоего банею пакибытия, Егоже обильно излиял еси, да оправдившеся благодатию Его, наследницы будем вечныя жизни во Царствии Твоем, идеже со всеми святыми сподоби нам прославити всесвятое Имя Твое со Безначальным Твоим Отцем и со Пресвятым и Благим и Животворящим Твоим Духом ныне и присно и во веки веков. Аминь.

Тропарь Крещению Господню

Тропарь, глас 4 (Предпразднеству)
Готовися, Завулоне, и красуйся, Неффалиме, Иордане реко, стани, подыми, взыграя, креститися грядуща Владыку. Веселися, Адаме с праматерию, не крыйта себе, якоже в рай прежде, ибо, наги видев вы, явися, да облечет в первую одежду: Христос явися, всю тварь хотя обновити.

Тропарь, глас 4 (Предпразднеству, навечерие)
Возвращашеся иногда Иордан река милотию Елиссеевою, вознесшуся Илии, и разделяхуся воды сюду и сюду и бысть ему сух путь, иже мокрый, во образ воистинну Крещения, имже мы текущее жития преходим шествие: Христос явися во Иордане освятити воды.

Тропарь, глас 1
Во Иордане крещающуся Тебе, Господи, Троическое явися поклонение: Родителев бо глас свидетельствоваше Тебе, возлюбленнаго Тя Сына именуя: и Дух в виде голубине извествоваше словесе утверждение: явлейся, Христе Боже, и мир просвещай, слава Тебе.

Кондак, глас 4
Явился еси днесь вселенней, и свет Твой, Господи, знаменася на нас, в разуме поющих Тя: пришел еси и явился еси, Свет неприступный.

Величание
Величаем Тя, Жизнодавче Христе, нас ради ныне плотию крестившагося от Иоанна в водах Иорданских.

Акафист Кресту Господню

Добавить в Любимые закладки

Кондак 1

Приидите, христоименитии людие, составим похвалу Честному Кресту, на нем же Христос, Царь Славы, руце распростер, возведе нас на первое блаженство, из негоже низпадохом прелестию змиевою. Ты же, о пресвятый Кресте, яко имеяй присущую тебе силу Распятаго Христа, спасай и сохраняй от всяких бед любовно зовущия ти: Радуйся, Честный Кресте, всерадостное знамение нашего искупления.

Икос 1

Ангелов лицы, яко Божии служителие, Крест обстояще, вольную страсть Христа Жизнодавца прославляют. Мы же страданьми Того вечныя смерти избавльшеся, подражая Горним Силам, радостно взываем: Радуйся, Кресте, яко на тебе Христос Бог наш, волею руце распростер, спасение наше содела; радуйся, яко распростершимся на тебе Христом преступление Адама и Евы, простерших руце ко древу запрещенному, упразднися. Радуйся, яко воздвижену бывшу на тебе, аки преступну, Законодавцу, древняя клятва, яже на нас бывшая, потребися; радуйся, яко содеявшимся на тебе, странным таинством род человеческий от тли смертныя свободися. Радуйся, яко Пострадавшим и Умершим на тебе жало смерти сокрушися; радуйся, того ради страдания Бог с человеки примирися. Радуйся, Честный Кресте, всерадостное знамение нашего искупления.

Кондак 2

Видя падших человеков, Господи, Ты вочеловечився, крест и смерть вольно плотию претерпел еси за род наш, да от смерти вечныя избавиши исповедающия Тя, Сына Божия и вопиющия Ти: Аллилуиа.

Икос 2

Разум человечь изнемогает в постижении велия тайны Твоего, Христе, воплощения и вольнаго за ны страдания: како Ты, Бог сый безстрастный, страсть крестную, яко человек, претерпел еси и сие орудие смерти Твоея соделал еси источником жизни и спасения всем благочестно в Тя верующим и хвалебно воспевающим: Радуйся, Кресте, на немже содеяся таинство, от века предопределенное; радуйся, яко на тебе совершися наше искупление, многообразне во образех и сенех предъявленное. Радуйся, яко умерый на тебе Жизнодавец, Кровь и воду источи, имиже грехи наша омываются; радуйся, яко каплями Святейшей Крове Его греховныя струпы душ наших очищаются. Радуйся, Кресте, якоже древо животное, еже есть посреде рая Божия, христианом вожделенный; радуйся, плодами безсмертия умно нас питающий и надеждою Жизни Вечныя малодушие наше ободряющий. Радуйся, Честный Кресте, всерадостное знамение нашего искупления.

Кондак 3

Крест Твой, аще и древо видимо есть существом, но Божественною одеяно есть силою, и чувственное миро выявляемо, умно наше чудотворит спасение, подвизая пети Тебе: Аллилуиа.

Икос 3

Имуще пред очима нашима Крест Пресвятый, святолепным поклонением той почитаем распеншагося ради на нем Спаса Христа, и, лобызая, взываем: Радуйся, Кресте, прославленный послушанием и страданием Христовым; радуйся, возвеличенный возвышением на тебе Сына Божия, Иже весь мир от падения Адамля воздвиже. Радуйся, яко сбывшагося на тебе ужаснаго таинства земли ужасеся и вострепета, аки бы хотящи поглотити законопреступныя; радуйся, яко заклавшую на тебе Агнцу Божию завеса храма раздрася и жертва ветхозаветная упразднися. Радуйся, Кресте, яко распадшуюся под тобою камню, каменносердечнии роди еврейстии неверием от Бога отпадоша, благодати же священства и царства лишишася; радуйся, яко омрачившуся солнцу в страсти Христовой нощь многобожия прейде и свет веры возсия. Радуйся, Честный Кресте, всерадостное знамение нашего искупления.

Кондак 4

Бурею злобы дышуще и завистию движими, первосвященницы иудейстии скрыша в землю Крест Твой, Христе Боже, да не будет обличением безумие их; но той, яко сокровище драгое, из недр земли возсия, тщанием благочестивыя царицы Елены обретенный и на радость всему миру явленный, с богокрасною песнию: Аллилуиа.

Икос 4

Видевше тогда христианстии людие Честнаго Креста обретение, прославляху распеншагося на нем Христа Бога, “Господи, помилуй”, — взывающе. Мы же ныне, подражающе им, прославляем Крест Его святый хваленьми сицевыми: Радуйся, Кресте, в землю сокровенный и оскверненное грехами наше естество земное освятивый; радуйся, явлением своим из недр земных хулителей воплощения и Божества Христова посрамивый. Радуйся, яко Пострадавый на тебе плотию прия всяку власть на Небеси и на земли, да всех и вся к Богу Отцу приведет; радуйся, яко Умерый на тебе яко человек силою Божества Своего сокруши заклепы ада и изведе оттуда души праведных. Радуйся, Кресте, яко разбойник благоразумный, Христу сраспявыйся, Того исповедавый, тобою, аки лествицею, на Небеса взыде; радуйся, яко и всех отсечением страстей Христу сраспинающихся возводиши в Царствие Небесное. Радуйся, Честный Кресте, всерадостное знамение нашего искупления.

Кондак 5

Господи, при Моисее иногда пророце точию образ Креста Твоего являем побеждаше врази Твоя, ныне же самый Крест Твой имуще, помощи просим: укрепи Церковь Твою и даруй ей победы на враги, да расточатся вси врази Твои, не вопиющий Ти: Аллилуиа.

Икос 5

Честнаго Креста, Христе, действо прообразив Амалика в пустыне Синайстей: егда бо простираше руце, креста образ творя, укрепляхуся людие; ныне же все вещей сбытие в нас исполнися: днесь крест воздвизается, и демони бегают, днесь тварь вся от тли свободися, яко вся Креста ради возсияши нам дарования. Темже, радующеся, вопием: Радуйся, Кресте, оружие Христово страшное, егоже демони трепещут; радуйся, яко силою на тебе Распятаго Христа бесовстии полчища далече прогоняются. Радуйся, яко силою действующия в тебе Божественныя благодати победы на сопротивныя христолюбивым людем даруются; радуйся, яко от тебе, яко высокоросленнаго и многоплодовитаго древа Христова на тебе страдания, плоды жизни и спасения нам произрастают. Радуйся, Честный Кресте, всерадостное знамение нашего искупления.

Кондак 6

Проповедником силы и Божества Христова явися иногда животворящее древо Крестное, егда прикосновением своим воскреси мертваго и к жизни возведе его, еже видевше, мнози от иудей и язычников познаша велию благочестия тайну: яко спасения ради человеческаго, Бог во плоти явился и страсть крестную претерпе, да спасет вопиющия Ему: Аллилуиа.

Икос 6

Якоже древо райское превелие, возвысися на Голгофе Честный Крест Христов, отонудуже во всю вселенную распростре мысленный ветви благодати и Распеншагося на нем: под егоже сению обретают прохладу палимии зноем страстей и хотящии благочестно жити о Христе Иисусе. Темже и мы, благодати Того причастницы, весело взываем: Радуйся, святый Кресте, древом жизни, Адама ради в Едеме насажденным, преображенный; радуйся, новым Адамом, руце на тебе распростершим, миру явленный. Радуйся, яко под сень благодатнаго защищения твоего вси вернии прибегают; радуйся, яко милосердием Даровавшаго нам тебе кающиися грешницы огня геенскаго избегают. Радуйся, Кресте, утешение наше в скорбех и печалех; радуйся, живительная отрадо и помощь изнемогающим в борьбе с прилогами страстей, мира и диавола. Радуйся, Честный Кресте, всерадостное знамение нашего искупления.

Кондак 7

Хотя явити роду человеческому благости и милосердия Своего неизследимую пучину, Крест Твой, Господи, дал еси нам тверда блюстителя и прогонителя демонов. Темже вси мы, иже в Тя верующии, прославляем величие страсти Твоея, благодарно поюще Тебе: Аллилуиа.

Икос 7

Дивны дела явил еси, Господи, Крестом Твоим Честным: распеншуся бо Ти на том плотию, вся тварь изменися: солнце лучи своя сокры, основания земли восколебахуся, ад сокрушися державою власти Твоея и изведе юзники, яже от века содержал есть. Сего ради увязаем той сими песненными цветы: Радуйся, Кресте, яко пострадавшему на Тебе вся тварь сострадаше, яко Творцу своему и Владыце; радуйся, яко силу Того и Божество свидетельствоваху солнце помрачением и земля колебанием. Радуйся, яко Умерый на тебе не удержан бысть в мертвых, но, разрушив державу смерти, в третий день воскресе; радуйся, яко воскресшу Тому проповедь евангельская, от лика апостольскаго наченшаяся, во вся концы земли изыде. Радуйся, Кресте, яко тобою кумирослужение и многобожие языческое упразднися; радуйся, яко тебе ради правая вера во Единаго Бога, в Троице славимаго, по всей земли утвердися. Радуйся, Честный Кресте, всерадостное знамение нашего искупления.

Кондак 8

Странно Бога вочеловечшася и на Кресте распята бывша мысленно видяще, устранимся суетнаго мира, ум на Небеса преложше. Сего ради Бог на землю сниде и на Крест взыде, да тем, аки лествицею, на Небеса возведет вопиющия Ему: Аллилуиа.

Икос 8

Днесь Адам со Евою веселится, предлежащий видяще Крест, имже поражен бысть супостат, иже древле в раи вкушением запрещеннаго плода тех прельстивый и пленники себе сотворивый. Темже и мы, срадующеся праотцем нашим о избавлении от пленения нашего душевнаго, благоговейно воспеваем: Радуйся, Кресте, яко на тебе Пастырь добрый душу Свою положи за овцы Своя и даже до ада сниде, ища заблудших; радуйся, яко Той не презре дело руку Своею, Адама со Евою, но со инеми праведники исхити я из ада, яко из челюстей зверя крепкаго, и в рай всели их. Радуйся, яко на тебе пригвожденному Христу пламенное оружие плещи даде и Херувим, Едем хранящий, отступи от Древа Жизни; радуйся, яко мы, ныне крещением возрожденнии, во Христе новые людие, невозбранно причащаемся райския пищи. Радуйся, Кресте, жезле силы Христовы, от Сиона посланный, имже мы пасемся на пажитех евангельских учений; радуйся, яко тобою невредими сохраняемся от волков душегубных, яко львове рыкающих и ищущих, кого поглотити. Радуйся, Честный Кресте, всерадостное знамение нашего искупления.

Кондак 9

Всяких бед и козней вражиих избави ны, Кресте треблаженный, яко приемый благодать и силу от пригвожденнаго на тебе Христа, Емуже яко Богу и Избавителю нашему благодарственно и хвалебно поем: Аллилуиа.

Икос 9

Ветийство всякое земнородных не довлеет к прославлению Креста Твоего, Господи, на немже спасение наше соделал еси; темже, недоумевающе восхвалити той по достоянию, взываем сице: Радуйся, Кресте, яко вознесенный на тебе Спас мира мнози люди в познание Свое призва и до ныне призывает; радуйся, яко возсиявый на тебе, аки на свещнице, Свет истинный вся концы земли светом Боговедения озаряет. Радуйся, яко ныне Восток и Запад Пострадавшаго на тебе прославляют; радуйся, яко и тя, яко подножие Христово, вси вернии, возносяще, прославляют. Радуйся, яко от тебе, яко от неизсякаемаго источника, христоименитии людие обилие благ вечных почерпают. Радуйся, Честный Кресте, всерадостное знамение нашего искупления.

Кондак 10

Спастися хотящим нам и под сень защищения твоего прибегающим, буди помощник, пресвятый Кресте, сохраняя ны от всех зол силою на тебе Распятаго Христа, Емуже яко Богу и Избавителю нашему благодарственно и хвалебно поем: Аллилуиа. 
 

Икос 10

Стена еси, ограждающая нас от бед и напастей, Кресте всечестный, и столп крепкий противу лица вражия, к немуже невидимии борителие приступити не смеют, боящеся взирати на силу Твою. Сего ради с верою ограждаемся святым твоим знамением и весело воспеваем: Радуйся, пречестный Кресте Христов, от нападения духов злобы нас защищаяй; радуйся, от различных стрел их невредимы ны сохраняяй. Радуйся, яко от знамения твоего, с верою благочестно творимаго, вся силы ада, яко дым от ветра, исчезают; радуйся, яко тобою вся крепость их, яко воск от лица огня, истаивает. Радуйся, яко святии мученицы, знамением твоим ограждашеся и имя Христово призвавше, всякий, вид мучений мужественно претерпеша; радуйся, яко преподобнии отцы помощию силы Божества, знамению твоему присущия, бесовская страхования и страстей возстания победиша. Радуйся, Честный Кресте, всерадостное знамение нашего искупления.

Кондак 11

Пение всеумиленное приносим Ти, всечестный Кресте, и смиренно молимся распятому на тебе Христу Богу нашему, Иже дарова нам тебе во отраду и утешение в скорбех, да страстию Своею избавит нас от страстей душевредных и научит благоверно воспевати Ему: Аллилуиа.

Икос 11

Светом благодати Божией, таинственне ти присущия, просвети наша душевная чувствия, Кресте пресвятый, да тою озаряеми и наставляеми, не поткнемся о камень соблазна, но да возможем путем заповедей Божиих правошествовати во всей жизни нашея, воспевающе ти сице: Радуйся, непрестающих чудес Христовых вестниче и милосердия Его к роду человеческому проповедниче; радуйся. Кресте, рода человеча обновление и Новаго Завета Христова печать и утверждение. Радуйся, торжество веры христианския и благонадежный якорю упования нашего; радуйся, святых храмов Божиих украшение и домов благочестивых ограждение. Радуйся, полей и вертоградов благословение; радуйся всех стихий освящение. Радуйся, Честный Кресте, всерадостное знамение нашего искупления.

Кондак 12

Благодать Твою всемощную подаждь нам, Господи, да последуем Тебе, Владыце нашему, вземше крест наш, не гвоздьми пригвождающеся тому, но трудами, воздержанием и смирением, да тако причастницы будем страданий Твоих, от нихже истекают потоцы Жизни Вечныя, напаяющия вся правоверныя, благочестно поющия Ти: Аллилуиа.

Икос 12

Поюще величие твое, всечестный Кресте, восхваляем тя вси, яко победоносный скипетр Царя Небеснаго, нашего же спасения всерадостное знамение, темже и вопием: Радуйся, Кресте, православных христиан державо и несокрушимое их ограждение; радуйся, святителей украшение и всех подвижников веры и благочестия сила и подкрепление. Радуйся, Кресте, от колыбели и до гроба на всех путех жизни нас ограждаяй и по смерти на воздушных мытарствах от духов злобы нас защищаяй; радуйся, яко под знамением твоим почивающии, умершии в вере и благочестии, в последний день воскреснут в Жизнь Вечную. Радуйся, Кресте, явлением своим на Небеси предварити имый славное Второе пришествие Христово; радуйся, яко распеншии Христа и вси невернии узрят тя тогда и горце возрыдают, любящии же Господа, зряще тя, вельми возрадуются. Радуйся, Честный Кресте, всерадостное знамение нашего искупления.

Кондак 13

О Пречестный и Животворящий Кресте Господень, всех христиан утешение! Тя ныне предлежаща видяще, возводимся мыслию к распятому на тебе Христу, Емуже и молимся смиренно, да тебе ради помилует нас, грешных, и сподобит в селениих райских воспевати Ему: Аллилуиа.

(Kондак читается трижды, затем 1-й икос)

Икос 1

Ангелов лицы, яко Божии служителие, Крест обстояще, вольную страсть Христа Жизнодавца прославляют. Мы же страданьми Того вечныя смерти избавльшеся, подражая Горним Силам, радостно взываем: Радуйся, Кресте, яко на тебе Христос Бог наш, волею руце распростер, спасение наше содела; радуйся, яко распростершимся на тебе Христом преступление Адама и Евы, простерших руце ко древу запрещенному, упразднися. Радуйся, яко воздвижену бывшу на тебе, аки преступну, Законодавцу, древняя клятва, яже на нас бывшая, потребися; радуйся, яко содеявшимся на тебе, странным таинством род человеческий от тли смертныя свободися. Радуйся, яко Пострадавшим и Умершим на тебе жало смерти сокрушися; радуйся, того ради страдания Бог с человеки примирися. Радуйся, Честный Кресте, всерадостное знамение нашего искупления.

Кондак 1

Приидите, христоименитии людие, составим похвалу Честному Кресту, на нем же Христос, Царь Славы, руце распростер, возведе нас на первое блаженство, из негоже низпадохом прелестию змиевою. Ты же, о пресвятый Кресте, яко имеяй присущую тебе силу Распятаго Христа, спасай и сохраняй от всяких бед любовно зовущия ти: Радуйся, Честный Кресте, всерадостное знамение нашего искупления.

Молитвы Честному и Животворящему Кресту Господню

Молитва первая

Кресте Честный, хранитель души и телу буди ми: образом своим бесы низлагая, враги отгоняя, страсти упражняя и благоговение даруя ми, и жизнь, и силу, содействием Святаго Духа и честными Пречистыя Богородицы мольбами. Аминь.

Молитва вторая

О Пречестный и Животворящий Кресте Господень! Древле убо был еси казни позорныя орудие, ныне же знамение спасения нашего присно почитаемое и прославляемое! Како достойне возмогу аз, недостойный, воспети Тя и како дерзну преклонити колена сердца моего пред Искупителем моим, исповедая грехи свои! Но милосердие и неизреченное человеколюбие Распеншегося на тебе смиренное Дерзновение подает ми, да отверзу уста моя воеже славити Тя; сего ради вопию Ти: радуйся, Кресте, Церкве Христовы красота и основание, всея вселенныя — утверждение, христиан всех — упование, царей — держава, верных — прибежище, Ангелов — слава и воспевание, демонов — страх, губительство и отгнание, нечестивых и неверных — посрамление, праведных — услаждение, обремененных — ослаба, обуреваемых — пристанище, заблудших — наставниче, одержимых страстьми — раскаяние, нищих — обогащение, плавающих — кормчий, слабых — сила, во бранех — победа и одоление, сирых — верное покровение, вдов — заступниче, дев — целомудрия охранение, ненадеянных — надежда, недужных — врач и мертвых — воскресение! Ты, прообразованный чудотворящим жезлом Моисея, животворный источник, напаяющий жаждущия духовныя жизни и услаждающий наши скорби; Ты — одр, на немже царственно почил тридневно Воскресший Победитель ада. Сего ради и утро, и в вечер, и полудне прославляю Тя, треблаженное Древо, и молю волею Распеншегося на Тебе, да просветит Он и укрепит Тобою ум мой, да открыет в сердце моем источник любве совершенней и вся деяния моя и путие мои Тобою осенит, да выну величаю Пригвожденнаго на Тебе, грех моих ради, Господа Спасителя моего. Аминь.

Акафист Успению Божией Матери

Добавить в Любимые закладки

Кондак 1

Избранной от всех родов Божией Матери и Царице, восходящей от земли к небеси, благоговейная пения о пречестнем Твоем успении приносим раби Твои, Богородице. Ты же, яко имущая победу над смертию, от всяких нас смертоносных бед свободи, да зовем Ти: Радуйся, обрадованная, во успении Твоем нас не оставляющая.

Икос 1

Ангел предстатель послан бысть рещи Богородице ко премирным Ея возшествие и приити предъявляше к Ней Сыну Ея и Богу, светло о Ней блистаяся и стоя, зовый таковая: Радуйся, прерадованная Мати Царева; радуйся, Небесная Царице, Мати Бога и Господа Небесе и земли. Радуйся, предпочтенная превеличеством пришествия к Тебе Сына Твоего и Бога; радуйся, возвеличенная извещением Твоего к Сыну отшествия. Радуйся, от всех родов Богом избранная; радуйся, святое вместилище Слова Божия. Радуйся, пророческаго проречения исполнение; радуйся, апостолом пречестный венче. Радуйся, святителем украшение и священником доброто; радуйся, правителем удобрение и державо. Радуйся, богомудрых иноков возведение к горнему Царствию; радуйся, отверзающая райския двери христианскому роду, присно Тя блажащему. Радуйся, обрадованная, во успении Твоем нас не оставляющая.

Кондак 2

Видяще апостолов лик, всесильным мановением от конец земли на облацех представших ко пречестному Твоему, Пренепорочная, успению, священноначальницы: Дионисий, небесный таинник, Иерофей дивный и Тимофей с боголепною честию священства пояху Богу: Аллилуия.

Икос 2

Разумная вся тварь, старейшая чиноначалия ангельская приидоша со своим Царем, Иже во Своя живоначальнейшыя руце душу Матере Своея прият; теплый же верою Петр со слезами многая к Ней изрече, зовый: Радуйся, ко премирным, Мати Творца миру, восходящая; радуйся, к пренебесным, пространнейшая небес, вземлющаяся. Радуйся, четверочастное стихий освятившая Твоим восхождением; радуйся, небесных возвеселившая Твоим прехождением. Радуйся, во Иерусалим горний прекрасный приятая; радуйся, в нерукотворенныя храмы прерадостно вшедшая. Радуйся, херувимов и серафимов Царице; радуйся, архангелов Владычице. Радуйся, прибежище верных и избавление; радуйся, достоянию Твоему помощь и защищение. Радуйся, о всем мире христианстем к Богу ходатаице; радуйся, благ всяческих всеблагая подательнице. Радуйся, обрадованная, во успении Твоем нас не оставляющая.

Кондак 3

Сила Вышняго восхити от Индии Фому, за некое изволение Божие не прилучшуся ему в пречестное успение Богоматере, и предпостави живоприемному Ея гробу, иже, преставльшуюся приник видети, уразуме вознесенную на небеса с телом и, веровав, о сем возопи: Аллилуия.

Икос 3

Имея в себе помышление ученик, яко Божиим смотрением бе ему не обрестися ко провождению Богоматере с прочими вкупе, обрадован быв о безсмертнем Ея успении, сия вопияше к Ней: Радуйся, восприемлемая от земли дланьма Сына Твоего; радуйся, ко превышним возшедшая наслаждатися славы Его. Радуйся, провождаемая от всех чиноначалий ангельских в горняя; радуйся, подъемлемая херувимы в небесная и наднебесная. Радуйся, в небесных вратех от старейших сил велелепно песньми возносимая; радуйся, от всех небесных граждан окружаемая и блажимая. Радуйся, небо земное, к горнему селению возвышенное; радуйся, престоле Господень, от земли вознесенный в Царствие Небесное. Радуйся, предстательство наше и крепкое заступление; радуйся, грешником споручнице во спасение. Радуйся, христианом Царице и по Бозе надеждо Небеснаго Царствия; радуйся, Мати Живота и по Господе нам упование жизни вечныя. Радуйся, обрадованная, во успении Твоем нас не оставляющая.

Кондак 4

Бурю внутрь имея Аффоний помышлений неверных и зря богоносными апостолы Богоматере пречестное тело всечестне ко гробу несенное, ко опровержению устремися; внезапу же, егда со ослеплением очию руце его отъяте ко одру прилеплене висясте, верою Матерь Божию исповедаше, вопия Богу: Аллилуия.

Икос 4

Слышавше таинницы и самовидцы Слова Ангелов, поющих превышними песньми при погребении богоприятнаго тела Божия Матере, и честь подати хотяще богоугодную, потщашася согласно пети, глаголюще: Радуйся, благовестие приемшая о прешествии Твоем в горнее Царствие; радуйся, от благовестившаго Гавриила приемшая радостнаго рая вравие. Радуйся, пречестное херувимское множество просветившая; радуйся, преславное серафимское естество возрадовавшая. Радуйся, от патриархов прообразованная; радуйся, от пророков предвозвещенная. Радуйся, злую дерзость Аффониеву скоро отместившая; радуйся, исцеление томужде подавшая. Радуйся, обратившая в веру Аффониево неверие; радуйся, верное того приемшая исповедание. Радуйся, возводящая к небеси любовь и веру к Тебе имущих; радуйся, спасающая верою имя Твое призывающих. Радуйся, обрадованная, во успении Твоем нас не оставляющая.

Кондак 5

Боготечныя звезды, апостоли святии, в поднебесней разсеяннии ради Евангелия, восхищени быша на облацех, по широте воздушней, ко погребению Матере Господни, Юже пеньми и песньми провождающе, с невещественными взываху: Аллилуия.

Икос 5

Видевше боговидцы своего Владыку, в руце Матере Своея душу приемша и, Господа Того разумевше, потщашася священнословия песньми благословне воспети Ю: Радуйся, Царице, над всеми Царствующаго носившая; радуйся, и Сама рукама Его Сыновнима носимая. Радуйся, скиптре царский в Христовой деснице; радуйся, в руце Ноя ветвь голубицы. Радуйся, жезле Ааронов, прозябший нетление; радуйся, крине неувядаемый, процветший безсмертие. Радуйся, богоотца Давида цевнице богодохновенная; радуйся, пророчествия его воставшая славо, псалтирю и гусли прекрасныя. Радуйся, одушевленный святыни Господни кивоте; радуйся, в покой Господень воскресший наш животе. Радуйся, скиние, от херувимов осеняемая; радуйся, святая святых, от серафимов глаголемая. Радуйся, обрадованная, во успении Твоем нас не оставляющая.

Кондак 6

Проповедницы богоноснии апостоли, по отшествии ко премирным Божия Матере во общем седении обычныя трапезы бывше и предложение части хлеба во имя Господне возносяще, внезапу свыше Богородицу Царицу, пришедшую со светоносными ангелы, зряху и, мир тем от Сына и Бога подавшую слышавше, возгласиша о сем: Аллилуия.

Икос 6

Возсия нам солнце правды Христос Бог от Твоих пречистых ложесн волею, и благоразумием проповедания чрез апостолы мир просвети, и Тя, Богоматерь, от рода и в род прослави. Темже и мы вси ублажаем Тя, вопиюще Ти: Радуйся, присно блажимая от всех родов во веки; радуйся, благоутробная и милостивая на человеки. Радуйся, ученическому лику обещание исполнившая; радуйся, присещением Твоим от Сына Твоего и Бога мир тому подавшая. Радуйся, всежелательное святых сладкое зрение; радуйся, преподобных матерей и дев святых всевеселящее радование. Радуйся, преходящая райское селение праведных; радуйся, посещающая всех во славе небесней сущих. Радуйся, начало человеческаго спасения; радуйся, исполнение всех благих желаний. Радуйся, по Бозе, Царе царствующих, Богородице Царице; радуйся, по Господе господствующих, Владыце нашем, Госпоже и Владычице. Радуйся, обрадованная, во успении Твоем нас не оставляющая.

Кондак 7

Хотящих всех с верою входити в храм Твой святый, Богородице, присно спасаеши и славящих Тя от всяких напастей и бед свобождаеши; темже и благоверным людем, присноблажащим Тя, победы на сопротивныя даруй и вся ко спасению прошения нам подавай, о сем молящимся Тебе и поющим Богу: Аллилуия.

Икос 7

Новую показа тварь, явлься нам, всех Творец Господь Тобою, Богородице. Ты же, сродное промышление о нас к Нему имущи, честне почитающих пречестное Твое успение приими, сицевая Тебе вопиющих: Радуйся, Мати Богу, избранная от земных; радуйся, превышшая земных и небесных. Радуйся, херувимов и серафимов горе превозшедшая; радуйся, лик ученический облаком ко погребению Ти доле совокупльшая. Радуйся, Фому по погребении Твоем силою Божиею предпоставившая изряднее; радуйся, чрез него уверившая Твое на небо с плотию преселение. Радуйся, красотою всех добродетелей украшенная; радуйся, краснейшему паче сынов человеческих Сынови Своему сопричтенная. Радуйся, яко финикс, плотию воскресшею процветшая; радуйся, яко кедр в Ливане небесном, умножившаяся. Радуйся, древо живота, насажденное посреде рая превышняго; радуйся, ковчеже мысленный, возвышенный в горняя от потопа смертнаго. Радуйся, обрадованная, во успении Твоем нас не оставляющая.

Кондак 8

Странно в превышних ведуще Тя, Избранная, яко солнце, Владычице, внутрь пренебесных недомыслимых красот и неизреченных доброт, умильно к Сыну и Богу, дланьма Его держиму возшедшую и прерадостно преклоньшуюся живоначальней Его деснице, о сем непрестанно вопием: Аллилуия.

Икос 8

Вся бывши горе, к небесным взята и земных не оставляющи, Богомати, рукама Сыновнима носима, в незаходимая вниде, во оный град всесветящий и прекрасный, Иерусалим вышний, херувимы обстоима со всеми небесными силами, идеже слышит поющих сия: Радуйся, Еяже пресвятая душа в вышнем всесветлом Сионе вселяется; радуйся, Еяже и нетленное тело таможде с душею купно прославляется. Радуйся, вшедшая в престольный град Самаго Вседержителя; радуйся, вознесшаяся в прекрасный рай вышняго Насадителя. Радуйся, пренесенная во град, основанный от каменей всесветящих; радуйся, введенная во ограду, обстоимую вои сил превышних. Радуйся, превышше небес во благолепие Божие взятая; радуйся, паче всех невещественных умов почтенная. Радуйся, приносящая к Сыну Своему и Богу моление верных; радуйся, и Сама непрестанно у престола Сына Твоего и Бога молящаяся о всех. Радуйся, предстательнице к Богу, мир спасающая; радуйся, заступнице роду христианскому, от Бога дарованная. Радуйся, обрадованная, во успении Твоем нас не оставляющая.

Кондак 9

Всякое естество ангельское превозносит Тя, Богородице, человечестии же роди вси Матерь Тя Божию славим и почитаем пречестное Твое успение, Царице: Тебе бо ради земнии небесным совокупляются, согласно поюще Богу: Аллилуия.

Икос 9

Ветийства Боговещанных пророческих речений ныне зрим о Тебе сбывшаяся, Богородице, яко воистинну Бога плотию родила еси нам. Темже таинству словесе Божия верующе, вопием: Радуйся, закона и пророков главизно совершенная; радуйся, звездо Иаковля, Валаамом прореченная. Радуйся, одре Царя Великаго, вещанный Соломоном; радуйся, руно, орошенное Иисусом, образованное Гедеоном. Радуйся, неопалимая купино, законоположником предзримая; радуйся, горо святая, мужем желания усмотренная. Радуйся, лествице небесная, Иаковом предвидимая; радуйся, двере непроходимая, Иезекиилем предзримая. Радуйся, солнце селения Христова, псалмопевцем предъявленное; радуйся, таинство, многообразне пророки пронареченное. Радуйся, пророческих глагол всех, предреченных о Тебе, конец принесшая; радуйся, Вышняго смотрения вся за спасение мира совершившая. Радуйся, обрадованная, во успении Твоем нас не оставляющая.

Кондак 10

Спасти хотя мир Иже всех Господь, от земнаго Тя рода избра в Матерь Себе и, нас ради быв Человек, взыде, отнюдуже сниде, к небеси от земли, и Тебе с Собою возведе ко пребыванию во славе вечней и соцарствованию с Собою, конца не имущему. Темже, яко Бог, слышит от всех: Аллилуия.

Икос 10

Стена еси верным, Богородице Дево, и заступление всем к Тебе прибегающим, ибо небесе и земли Творец, от Тебе плотию пришед, Пречистая, духом и телом в небесная Тя пресели, ко ближайшему предстательству о всех, ихже приглашати научи: Радуйся, граде Царя Великаго верху горы небесныя; Радуйся, стено и покрове, не крыющийся от нашего притекания. Радуйся, верным на враги пособствующая; радуйся, нашествия агарянская побеждающая. Радуйся, веры благочестивыя недвижимое сохранение; радуйся, еретичествующих полков разорение. Радуйся, радость и умирение миру сущая; радуйся, всегубительнаго ада поправшая. Радуйся, воинствующих на плоть целомудрием изрядное венчание; радуйся, мученических подвигов всечестное прославление. Радуйся, преподобных трудом ходатаице блаженнаго упокоения; радуйся, иноком благоскорбящим подательнице вечнаго радования. Радуйся, обрадованная, во успении Твоем нас не оставляющая.

Кондак 11

Пение всякое богодухновенных песней не довлеет от нас к похвале всечестнаго успения Твоего, всехвальная Владычице, Царице Богородице, но усердно Тебе приносим, яко Матери Царя всех, смиренное моление наше, с небесными чинми поюще единому достойно прославляющему Тя Богу: Аллилуия.

Икос 11

Светоприемная свеща истиннаго Света сущим нам на земли явльшися, души просвещаеши и чтущих Твое всечестное преставление к разуму Божественному наставляеши, да поем Ти сицевая: Радуйся, свеще неугасимая огня невещественнаго; радуйся, заре незаходимая Света невечерняго. Радуйся, луно, от Солнца правды облиставаемая; радуйся, светлосте, во тьме светящая. Радуйся, светильниче, на свещнице превышнем поставленный; радуйся, источниче жизни, из гроба во свет изведенный. Радуйся, Мати Света умнаго, благочестивых души просвещающаго; радуйся, Мати всех Бога, озлобленных души утешающаго. Радуйся, уповающим на Тя живота конец непостыдный дарующая; радуйся, достояние Божиим и Своим рабом на Суде Сына Твоего одесную Его устрояющая. Радуйся, Преблаженная, яко Тобою блажени есмы и мы, иже помощницу Тя имамы; радуйся, Преблагословенная в род и род, яко Господь с Тобою, и Тобою с нами. Радуйся, обрадованная, во успении Твоем нас не оставляющая.

Кондак 12

Благодать высокопрестольныя славы, на небесех дарованную Богоматери, почтенной седением одесную Сына Ея и Бога, видяще горнии уми, подъяша Ю престоли и силы, окружиша начала и власти, припадоша страшнии херувими, серафими и господства, со архангелы и ангелы вопиюще: Аллилуия.

Икос 12

Поюще всечестное Твое успение, восхваляем вси ко пренебесным возсшествие Твое, Царице Богомати. Ты же освяти, прослави и спаси всех, любовию поющих Тебе: Радуйся, очистившая землю пречистыми ног Твоих стопами; радуйся, освятившая воздух восхождением Твоим к небеси. Радуйся, на небесный круг возступившая; радуйся, вся доброты неизреченныя зрящая. Радуйся, во славе приседящая престолу Сына Твоего и Бога; радуйся, с Сыном и Богом вечно царствующая. Радуйся, красото в деснице Господней, украшающая блажащих Тя всех небесных; радуйся, обрадованная надеянием на Тя всех земных. Радуйся, облеченная в солнце, сияющая благодатию и славою всей вселенней; радуйся, обещавшая сохраняти и спасати призывающих Тя всех в поднебесней. Радуйся, от христианских родов Мати Божия почитаемая и Богородица именуемая; радуйся, от восток солнца до запад преславно и православно от всех благочестивых славимая. Радуйся, обрадованная, во успении Твоем нас не оставляющая.

Кондак 13

О всепетая Мати безсмертнаго Царя небесе и земли, Христа Бога нашего, живущая и по смерти, нынешняя приношения о всечестном Твоем успении от нас приемши, в жизни сей и в смертнем успении нашем от всякия напасти, бед и муки избави и Небеснаго Царствия нас, Царице, сподоби, о Тебе вопиющих: Аллилуия.

Сей кондак читается трижды, затем 1-й  икос  и 1-й кондак.

 

Молитва

О Пресвятая Богородице Дево Владычице, высшая ангел и архангел и всея твари честнейшая, ангельское великое удивление, пророческая высокая проповедь, апостольская преславная похвало, святителей изрядное украшение, мучеников крепкое утверждение, иноков спасительное наставление, постников неизнемогающее воздержание, девствующих чистото и славо, матерей тихое веселие, младенцев мудросте и наказание, вдовиц и сирых кормительнице, нагих одеяние, болящих здравие, пленников избавление, по морю плавающих тишино, обуреваемых небурное пристанище, блуждающих нетрудная наставнице, путешествующих легкое прохождение, труждающихся благое покоище, в бедах сущих скорая заступнице, обидимых покрове и прибежище, ненадеющихся надеяние, требующих помощнице, печальных присное утешение, ненавидимых любовное смирение, грешников спасение и к Богу присвоение, правоверных всех твердое ограждение, непобедимое поможение и заступление! Тобою нам, Владычице, Невидимый видим бысть, и Тебе мольбу приносим, Госпоже, грешнии раби Твои: о премилостивая и пречудная Света умнаго Царице, рождшая Царя Христа, Бога нашего, Живодавца всех, от небесных славимая и от земных хвалимая, ангельский уме, светозарная звездо, святых пресвятейшая, Владычице всех тварей, Боголепная Девице, нескверная Невесто, палато Духа Пресвятаго, огненный престоле невидимаго Царя, небесный кивоте, носило Слова Божия, огнеобразная колеснице, покоище живаго Бога, неизреченное составление плоти Христовы, гнездо Орла небеснаго, горлице богогласная, голубице кроткая, тихая и незлобивая, Мати чадолюбивая, милостей бездно, разверзающая тучу гнева Божия, неизмеримая глубино, неизреченная тайно, несведомое чудо, неруко- творенныйхраме Единаго Царя всех век, благоуханное кадило, честная багрянице, Боготканная порфиро, душевный раю, живоноснаго Сада отрасле, цвете прекрасный, процветший нам небесное веселие, грозде спасения нашего, чаше Царя Небеснаго, в нейже растворися от Духа Святаго вино неисчерпаемыя благодати, ходатаице закона, зачало истинныя веры Христовы, непоколебимый столпе, мечу ярости Божия на богопротивных, бесов устрашение, во бранех побеждение, христиан всех неложная хранительнице и мира всего известное спасение!

    О всемилостивая Госпоже Дево  Владычице Богородице, услыши нас, молящихся Тебе, и яви милость Твою на людех Твоих, моли Сына Своего избавитися нам от всякаго зла и сохрани обитель нашу и всяку обитель, и град, и страну верных, и люди, благочестно прибегающия и призывающия имя Твое святое, от всякия напасти, губительства, глада, труса, потопа, огня, меча, нашествия иноплеменников и междоусобныя брани, от всякия болезни и всякаго обстояния, да ни ранами, ни прещением, ни мором, ни всяким праведным гневом Божиим умалятся раби Твои. Но соблюдай и спасай милостию Своею, Госпоже, за ны молящися, и полезное благорастворение воздуха ко времени плоднаго приношения нам даруй. Облегчи, возстави и помилуй, премилостивая Владычице, Богородице препетая, во всякой беде и нужде сущыя.  Помяни рабы Твоя и не презри слез и воздыхания нашего, и обнови нас благостию Своея милости, да со благодарением утешаемся, обретше Тя помощницу. Умилосердися, Госпоже Пречистая, на немощныя люди Твоя, надеждо наша. Разсеяннныя собери, заблуждшыя на путь правый настави, отпадшыя от благочестивыя отеческия веры паки возврати, старость поддержи, юныя вразуми, младенцы воспитай и прослави славящыя Тя, изряднее же Церковь Сына Твоего соблюди и сохрани в долготу дний.

      О милостивая и премилостивая Царице небесе и земли, Богородице Приснодево!  Ходатайством Твоим помилуй страну нашу и воинство ея и вся православныя христианы, сохраняющи их под кровом милости Твоея, ризою Твоею честною защити и моли из Тебе воплощшагося без семене Христа, Бога нашего, да препояшет ны свыше силою на вся видимыя и невидимыя враги наша.  Спаси же и помилуй, Госпоже, великаго господина и отца нашего Алексия, Святейшаго Патриарха Московскаго и всея Руси, преосвященныя митрополиты, архиепископы и епископы православныя, иереи же и диаконы, и весь причет церковный, и весь монашеский чин, и вся правоверныя люди, покланяющыяся и молящыяся пред честною Твоею иконою. Призри на всех нас призрением милостивнаго Твоего заступления, воздвигни нас из глубины греховныя и просвети очи сердечныя ко зрению спасения, милостива нам буди зде и на Страшнем Суде Сына Твоего о нас умоли, преставльшияся во благочестии от жития сего рабы Твоя в вечней жизни со ангелы и архангелы и со всеми святыми причти, да одесную Сына Твоего и Бога предстанут, и молитвою Твоею сподоби вся православныя христианы со Христом жити и радости ангельския в небесных селениих наслаждатися.  Ты бо еси, Госпоже, слава небесных и упование земных, Ты наша надежда и заступница всех притекающих к Тебе и Твоея святыя помощи просящих. Ты молебница наша теплая к Сыну Твоему и Богу нашему.  Твоя Матерняя молитва много может на умоление Владыки, и Твоим предстательством ко престолу благодати пресвятых и животворящих Его Таин приступати дерзаем, аще и недостойни есмы. Темже, всечестный образ Твой и рукою Твоею держимаго Вседержителя видяще на иконе, радуемся, грешнии, со умилением припадающе, и любовию сей целуем, чающе, Госпоже, Твоими святыми богоприятными молитвами доити небесныя безконечныя жизни и непостыдно стати в день судный одесную Сына Твоего и Бога нашего, славяще Его, купно со Безначальным Отцем и Пресвятым, Благим, Животворящим и Единосущным Духом во веки веков.  Аминь

Акафист Святому Духу

Добавить в Любимые закладки

Кондак 1

Приидите, вернии, Духа Святаго прославим сошествие, Иже от Отеческих недр на апостолов излився яко водами, боговедением покры землю, и живоносныя благодати богоусыновления, и горния славы сподобляет чисте притекающих к Нему, освящает же и обожает зовущих:
Прииди, Утешителю Душе Святый, и вселися в ны.

Икос 1

Ангели на небеси светлыми хорами Духу Святому несмолкаемо славу поют, яко источнику жизни и свету невещественному, божественными молниями мир просвещающему. С ними же и мы прославляем Тя, Душе непостижимый, за вся явныя и тайныя милости Твоя, и смиренно просим блаженнаго осенения Твоего:
Прииди, свете истинный и радосте духовная; прииди, росоносный облаче и красото неизреченная. Прииди, и приими яко курение благовонное хвалу нашу; прииди, и даждь нам вкусити радость явления Твоего. Прииди, и сотвори сей день днем милосердия Твоего; прииди, и возвесели нас обилием даров Твоих. Прииди, святость безмерная, и всяку скверну далече от нас отжени; прииди, вечное солнце незаходимое, и обитель Твою в нас сотвори.

Прииди, Утешителю Душе Святый, и вселися в ны.

Кондак 2

Видением огненных языков, во свете и дыхании бурнем и радостотворнем сниде Дух Святый на апостолов. Пламенем Его объятии, рыбари мир весь в Церковь Христову призваша, беды на суши и водах радостно терпяще, лютых смертей не убояшася, и во всю землю изыде вещание их: Аллилуиа.

Икос 2

Чаша дождеродно огнеточивая, излившаяся на апостолов в горнице Сионстей: Тебе поем, Тебе благословим, Тебе благодарим, Боже Душе Святый, низпосли и на нас премудрость Твою:
Прииди, Освятителю и Хранителю Церкви; прииди, и даждь едино сердце и едины уста верным Твоим. Прииди, и воспламени наше хладное и безплодное благочестие; прииди, и разжени огустевающий над землею мрак безбожия и нечестия. Прииди, и даждь нам вкусити, яко Благ еси; прииди, и настави нас на всяку истину. Прииди, и вся помышления наша покори владычеству Твоему; прииди, Мудросте непостижимая, и имиже веси судьбами спаси нас.
Прииди, Утешителю Душе Святый, и вселися в ны.

Кондак. 3

Тайна глубочайшая, Боже Душе непостижиме, со Отцем и Словом Создателю всех! Ты украсил еси горния чины ангелов в храме неприступнаго света, Ты воззвал к бытию хоры огненных светил с великолепием славы, Ты, плоть и дух в чудное единство согласуя, сотворил еси род человеческий, и всякое дыхание поет Тебе хвалу: Аллилуиа.

Икос 3

Альфа и омега, начало и конец Ты, Душе вечный, необъятною силою парения над водами и страшным кругообстоянием животворил еси всех и вся. От живоноснаго дыхания Твоего из безвидныя бездны возсияла есть неизреченная красота первозданнаго мира. Сего ради взываем Ти:
Прииди, великий и в малом цветке, и в небесней звезде; прииди, всяким дыханием на небеси и на земли хвалимый. Прииди, сокровище многообразных даров неисчерпаемое и красото вечная; прииди, и озари мрачный хаос моея души. Прииди, и благодатию Твоею семя жизни духовныя оживи в нас; прииди, и духом света и крепости колеблющееся произволение наше утверди. Прииди, и в светлый образ Твой устрой мрачное безобразие души моея; прииди, и яви нас новою тварию во Христе.
Прииди, Утешителю Душе Святый, и вселися в ны.

Кондак 4

Непостижимый и Всеблагий! Ты облекл еси Пречистую Деву Марию в ослепительный и неприступный блеск Твоего Божества, соделав Материю Бога, Царицею ангелов, спасением людей! Силою премирною Ты возносиши их до третияго небесе! Ты уязвляеши их сердца красотою небесною, влагая в их речи жгучее стремление, влекущее людей к Богу. Ты обращаеши последних грешников, и полные горняго восторга, поют они Тебе: Аллилуиа.

Икос 4

Святым Духом всяка душа живится, Его силою возстановятся к общению воскресения вся создания в последний час нынешняго века и в первый будущаго. Тогда воздвигни нас из гробов, не к осуждению, но к божественному блаженству со всеми святыми и с близкими нам:
Прииди, и избави нас от смерти духовныя; прииди, и даждь нам всегда память смертную. Прииди, и пред кончиною насыти нас телом и кровию Христа; прииди, и даждь нам успение тихое и с чистою совестию. Прииди, и сотвори светлым наше пробуждение от смертнаго сна; прииди, и буди с нами, егда предстанем оному Страшному Судии. Прииди, и сподоби нас увидети с радостию ликующее утро вечности; прииди, и яко солнце просвети тогда безсмертная телеса наша.
Прииди, Утешителю Душе Святый, и вселися в ны.

Кондак 5

Услышав глас Твой: аще кто жаждет, да грядет ко Мне и да пиет, молим Тя, Сыне Божий, утоли нашу духовную жажду, даждь нам воду живую, излей нам от Духа Святаго Твоего, да не возжаждем во веки, со умилением поюще: Аллилуиа.

Икос 5

Нетленный и несотворенный, вечный и щедрый Душе, праведных хранителю и грешных очищение, свобода нас от всяких нечистых дел, да не погаснет в нас сияние благодатнаго света Твоего, вопиющих Ти:
Прииди, Всеблагий, и даждь нам умиление и источник слез; прииди, и научи нас покланятися Тебе духом и истиною. Прииди, истине вечная, и уясни недоумения ума нашего скуднаго; прииди, жизнь нестареемая, и отжени от нас прельщения краткаго века сего. Прииди, свете незаходимый, и разсей мрак страстей наших и уныния; прииди, вечно юная сило, освежи изнемогающих чад Твоих. Прииди, безконечная радосте, и забудутся невзгоды временныя; прииди, и изсохшую землю душ наших плодоносну покажи.
Прииди, Утешителю Душе Святый, и вселися в ны.

Кондак 6

Ликуй, дщерь света, святая мати Сион, украшайся, великая невесто, небеси подобная светло блистающая вселенская Церковь Христова, на тебе почивает Дух Святый, немощная врачуя, оскудевающая восполняя и мертвыя Духом оживляя, и к вечной жизни приводя всех, достойно и праведно о Тебе зовущих: Аллилуиа.

Икос 6

В мире скорбни будете, рече Господь. Где обрящем отраду и кто утешит нас? Душе Утешителю, Ты утоли наша печали, ходатайствуй о нас воздыхании неизреченными, облегчи сердца молящихся Тебе:
Прииди, сладкая прохладо труждающихся и обремененных; прииди, собеседниче узников и спутниче гонимых. Прииди, пище алчущих и нищетою изнуренных; прииди, пристанище сирым и вдов утешение. Прииди, и уврачуй страсти душ и телес наших; прииди, и посети всех жаждущих Твоего озарения. Прииди, и поддержи безпомощных и слабых; прииди, и научи нас в привременных скорбех обретати надежду вечныя радости.
Прииди, Утешителю Душе Святый, и вселися в ны.

Кондак 7

На Святаго Духа хулившему не простится ни в сем веце, ни в будущем, рече Господь. Слышаще сие трепещем, да не осудимся с непослушными Тебе и богоборными; не уклони сердца наша в словеса лукавствия, обрати от расколов, ересей и безбожия всех заблуждших, и в Церкви первенец сподоби во веки веков воспевати: Аллилуиа.

Икос 7

Егда отступил Дух Святый от Саула, тогда страх и уныние постиже его, и тьма отчаяния низверже его в преисподнюю. Тако и аз в день уныния и ожесточения моего да разумею, яко несть во мне Бога, но даждь мне неослабно звати Тя, души моея отрадо, дондеже свет Твой озаряет мя малодушнаго:
Прииди, и не отвержи мене за роптание и нетерпение мое; прииди, и умиротвори лютую бурю смятения и раздражения. Прииди, и успокой озлобленных житейскими невзгодами; прииди, и смягчи сердце в день ожесточения и гнева. Прииди, и облегчи согбенных тяжестию креста; прииди, и сокруши козни смущения и страхования духов тьмы. Прииди, и возсияй нам свет Твой благий; прииди, и вдохни в нас великодушие, да терпением спасем души наша.
Прииди, Утешителю Душе Святый, и вселися в ны.

Кондак 8

Спаси нас, Отче Небесный! Мы несчастны и жалки, и слабы, и наги духовно; даруй нам злато Твое, огнем очищенное, покрый нас от срама одеждою белою, исцели помазанием Твоим очи наша, благодать животворящаго Твоего Духа да снидет в нечистии сосуды душ наших, и возродит поющих: Аллилуиа.

Икос 8

Яко Вавилонская башня рушится счастье земное, жалки вся начинания человеческия! Благо мне, яко смирил мя еси, яко открыл еси мне в согрешениих и падениих моих всю слабость и ничтожество мое! Без Тебе не можем творити ничесоже, но благодатию Твоею уповаем спастися:
Прииди, премудрый строителю жизни; прииди, да разумеем и мы спасительныя пути Твоя. Прииди, яко молния, и освети цель нашего бытия; прииди, и благослови всякое благое начинание. Прииди, и буди помощником в добрых делех; прииди, озаряя в час недоуменный. Прииди, даруя дух покаяния, да отвратятся тем грядущия на мир беды; прииди, и научи нас присно творити волю Твою.
Прииди, Утешителю Душе Святый, и вселися в ны.

Кондак 9

Тако возлюби Бог мир, яко и Сына Своего единороднаго дал еси, Иже от Духа Святаго и Марии Девы вочеловечився, кровию Своею весь мир искупил, на кресте простирая зиждительныя руцы до звезд; темже всю тварь свободи, чад Божиих содела. Сего ради Отцу Возлюбленному, Сыну Искупившему и Духу Освящающему поем: Аллилуиа.

Икос 9

Дух животворящий, яко голубь сошедый на Христа на Иордане, опочил есть и на мне при купели крещения, но помрачися доброта Его от тьмы грехопадений моих. Яко путник заблуждшийся нощию в лесу ожидает зари, тако и аз жажду лучей Твоих, Блаже, да не погибну до конца:
Прииди ко мне, запечатленному страшным и великолепым именем Твоим; прииди, и даждь ми зрети моя прегрешения. Прииди, и облегчи совесть мучимую, нещадно палимую; прииди, обнови омраченный Твой образ. Прииди, и разсей греховная видения; прииди, и научи сострадати чуждему горю. Прииди, и подвигни мя любити всякое создание Твое; прииди, и воздаждь ми радость спасения Твоего.
Прииди, Утешителю Душе Святый, и вселися в ны.

Кондак 10

Дух Святый возраждает в жизнь вечную, Дух Святый вдохновляет мучеников, венчает праведников, хлеб и вино совершает Телом и Кровию божественными. О глубино богатства и премудрости Божией! Даруй нам венец Твоих даров, всепрощающую вечную любовь, скорбящую за врагов, хотящую всем спастися, да озареннии ею, яко чада света поем: Аллилуиа.

Икос 10

Кто нас отлучит от любве Божией? Скорбь ли, или теснота, или гонения, или глад, или нагота, или беды, или меч? Аще и всего лишимся на земли, имамы наследие неувядаемое на небеси. Но даруй нам, Господи, любити Тя не словом или языком, но истинным делом и подвигом всея жизни:
Прииди, Душе всесильный, и умножи в нас всепобеждающую веру; прииди, и даждь нам непрестанное горение молитвенное. Прииди, да не охладеет любовь наша в среде беззакония; прииди, и не даждь нам отпасть во дни гонения и посмеяния веры. Прииди, и сохрани нас от непосильных искушений и соблазнов; прииди, и оживи сердца наша кроплением росы Твоея. Прииди, и непостыдное упование на милость и помощь Божию всели в нас; прииди, уврачуй, освяти и возстави нас, Блаже, Твоею благодатию.
Прииди, Утешителю Душе Святый, и вселися в ны.

Кондак 11

Тако глаголет Господь: излию от Духа Моего на всяку плоть, и прорекут сынове и дщери ваши, и юноши ваши видения узрят, и старцы сония увидят. Душе всежеланный, даждь хотя единую от крупиц с трапезы сынов утешения Твоего и нам, пламенно зовущим: Аллилуиа.

Икос 11

Аще и на краткое мгновение, яко блистание молнии Ты возсияеши в тайнике души, но незабвенно есть светолитие откровения Твоего, от него же страшным и боголепным изменением преображается бренное естество. Сподоби еще в земном житии чистым сердцем узрети Тя и нам, молящимся Тебе:
Прииди, светоподательная молние вечности; прииди, и озари нас невечерним сиянием Твоим. Прииди, сокровище смиренномудрых и веселие кротких; прииди, водо живая и прохладная среди зноя страстей. Прииди, ибо вдали от Тебе несть радости ни покоя; прииди, ибо с Тобою всюду Небесное Царство. Прииди, и возгрей любовь Божию в охладевших сердцах наших; прииди, и напечатлей в души солнцевидный лик Твой.
Прииди, Утешителю Душе Святый, и вселися в ны.

Кондак 12

Благости реко неистощимая, Душе, грехов разрешителю, приими моления наша о всем мире, о верующих и неверующих, и о сынах противления, всех приведи к вечному царствию Святыя Троицы, да упразднится Тобою и последний враг смерть, и мир, возрожденный очистительным огнем, воспоет новую песнь безсмертия: Аллилуиа.

Икос 12

Зрю духом град Божий, Иерусалим небесный, яко невеста украшенный, солнцевидный, торжествующий, слышу ликование праведных на трапезе Господней, и гласы ангелов, и пресветлаго Господа посреде избранных Своих! Се, отбеже болезнь и печаль и воздыхание. Царь Небесный, седмерицею даров Своих сподоби нас сея вечныя радости в Бозе зовущих Ти:
Прииди, Царю Небесный, и седмерицею даров Твоих нищету нашу духовную покрый; прииди, и Духом ведения и благочестия сердца наша умили. Прииди, и возбуди в нас жажду загробнаго бытия; прииди, и запечатлей в души чаяние жизни нетленнаго века. Прииди, и открой нам радость грядущаго Царствия; прииди, и даждь нам снегосветлую ризу чистоты. Прииди, и возьми нас на брак Агнчий; прииди, и сподоби в вечней славе Твоей царствовати.
Прииди, Утешителю Душе Святый, и вселися в ны.

Кондак 13

О светоносная пучино спасающей любве, Душе животворящий, согрей дыханием Божества Твоего оледеневший в беззакониих род человеческий, силою непостижимых судеб Твоих ускори погибель зла, и яви вечное торжество Божественныя правды, да будет Бог всяческая и во всех, и всяко колено небесных и земных и преисподних да воспоет: Аллилуиа.
(Этот кондак читается трижды, затем снова 1-й икос и 1-й кондак.)

+++

Молитва первая

Царю Небесный, Утешителю Всеблагий, Душе истины, от Отца предвечно исходяй и в Сыне выну почиваяй, независтный источниче дарований божественных, разделяя их коемуждо, якоже хощеши, Имже и мы недостойнии освятихомся и назнаменани есмы в день крещения нашего! Призри на молитву раб Своих, прииди к нам, вселися в ны, и очисти души наша, да будем уготовани в жилищи Пресвятыя Троицы. Ей, о Всеблагий, не возгнушайся нашея нечистоты и ран греховных, но исцели я всеврачующим помазанием Твоим. Просвети наш ум, да разумеем суету мира и яже в мире, оживи нашу совесть, да немолчно возвещает нам яже подобает творити и яже отметати, исправи и обнови сердце, да не источает день и нощь помышлений злых и желаний неподобных. Укроти плоть и угаси росоносным дыханием Твоим пламень страстей, имже помрачается в нас драгоценный образ Божий. Духа праздности, уныния, любоначалия и празднословия отжени от нас, подаждь же нам духа любве и терпения, духа кротости и смирения, духа чистоты и правды, да исправив разслабленная сердца и колена, неленостно течем по пути заповедей святых, и тако избегая всякаго греха и исполняя всяку правду, сподобимся улучити кончину мирну и непостыдну, внити в Иерусалим небесный, и тамо покланятися Тебе купно со Отцем и Сыном, поя во веки веков: Троице Святая, слава Тебе. Аминь.

Молитва вторая

Душе Святый! Всю вселенную собою наполняяй, и всем жизнь подавали, от скверных же человек удаляяйся, смиренно молю Тя: не гнушайся нечистоты души моея, но прииди и вселися в мя и очисти мя от всякия греховныя скверны. Да помощию Твоею прочее время живота моего поживу в покаянии и творении дел благих, и тако прославлю Тя со Отцем и Сыном во веки веков. Аминь!